АҚШда Lego доналаридан Chevrolet Silverado пикапининг аниқ нусхаси ясалди (видео)

Фото: Ryan Hildebrand / commons.wikimedia.org

АҚШнинг Коннектикут штатидан Lego Master Builders жамоаси Chevrolet компанияси билан ҳамкорликда Lego болалар конструкторининг юз минглаб деталларидан Chevrolet Silverado пикапининг аниқ нусхасини яратди. Ушбу “автомобил” Детройтдаги автосалонда намойиш қилинган.

Автомобилнинг Lego-версияси ишловчи фараларга эга ва оригинал автомобилнинг кўплаб деталларини аниқ такрорлайди. Уни йиғиш учун 18 киши 2000 соат давомида меҳнат қилган. Автомобил нусхасини йиғишга 334544 детал керак бўлган. Пикапнинг нусхаси экранларга тез орада чиқадиган “Лего: Фильм 2” фильмига бағишланган.

Chevrolet Silverado 1999 йилдан бери ишлаб чиқарилади. 2017 йилда компания ушбу моделнинг 4-авлодини тақдим қилган.

2018 йил августда Lego компанияси миллионта кубчадан йиғилган Bugatti Chiron спорткарининг тўлиқ ўлчамли нусхасини намойиш қилганди. Ушбу автомобил қисман Lego деталларидан йиғилган 5 от кучига эга мотор билан жиҳозланган бўлган. Машина трекда 20 км/соат тезликкача тезлаша олган.