Бандлик органи юборган шахсларни ишга олмаганлик учун жавобгарлик бекор қилинади

1 сентябрдан эътиборан бўш иш ўринларига бандлик органлари юборган шахсларни ишга қабул қилмаганлик учун маъмурий жавобгарлик бекор қилинади. Иш берувчилардан бўш иш ўринлари тўғрисида ҳисобот бериш мажбурияти ҳам олиб ташланади.

Фото: Президент матбуот хизмати

“Меҳнат муносабатлари ва касбга тайёрлаш тизимини такомиллаштириш ҳамда иш берувчиларни рағбатлантиришга оид қўшимча чора-тадбирлар тўғрисида”ги президент фармони қабул қилинди.

Бўш иш ўринларига бандлик органлари томонидан юбориладиган шахсларни ишга қабул қилмаганлик учун маъмурий жавобгарлик 2025 йил 1 сентябрдан бекор қилинади.

Шу санадан эътиборан, бўш иш ўринлари мавжудлиги тўғрисидаги ҳисоботларни мажбурий тақдим этиш талаби ҳам бекор қилинади.

2025 йил 1 ноябрдан бошлаб, хўжалик юритувчи субъектлар қуйидаги шахслар учун иш ўринларининг мажбурий захираларини шакллантиради:

ногиронлиги бўлган шахслар;
оилавий (маиший) зўравонликдан жабрланган шахслар;
Камбағал оилалар реестридаги оилаларнинг аъзолари;
муқобил жойлаштириш шаклларида тарбияланган етим шахслар;
ота-она қарамоғидан маҳрум бўлган шахслар.

Мажбурий захиралаш ходимлари сони 100 нафардан ортиқ бўлган ташкилотларга нисбатан қўлланади ҳамда ходимлар умумий сонининг 3 фоизидан ошмаслиги зарур.