Болгарияда 22 ёшли ўзбек чўкиб кетиб, жасади қоятошлар орасига тиқилиб қолди

“Менинг ўзим кеча ишда эдим, дўстларим менга хабар беришди. У 22 ёшда эди ва йигит чўкаётган қизлардан бирига ёрдам бераман деб ҳаракат қилган. Адашмасам, унинг ёнида дўстларидан ташқари украиналик қизлар бўлган ва уларнинг чўкаётганини кўриб, ёрдам беришга уринган. Бироқ, кучли тўлқин унинг ўзини оқизиб кетган. Бориб катта тошларга урилган бўлиши ҳам мумкин”, дейди Kun.uz’га мурожаат қилган ўзбекистонлик.

Видеода кўринишича, йигит тошлар орасига тиқилиб қолган ва у ерда тўлқин жуда ҳам кучли. Атрофдаги ўзбеклар полиция ва қутқарув хизматига хабар беришган. Болгария қутқарув хизмати ходимлари орадан соатлар ўтиб, зўрға етиб келишган ва айни пайтда чўкиб кетган инсонни сувдан чиқариб олишнинг иложи йўқлигини билдиришмоқда.

“911 қутқарув хизматига телефон қилдик, улар эса кеча кечқурун қидириш ишлари олиб бориш имконсизлигини билдиришди. Ўзимиз ва қирғиз биродарларимиз билан бирга қидирдик, 9 соатдан ортиқ дўстимизни топа олмадик. Охирида эса қоятошлар остидан унинг бадани кўринди. Лекин у ерда тошлар жуда катта ва қимирлаб турибди, тўлқин жуда кучли. Биз эплолмаяпмиз”, дейди Kun.uzʼга боғланган йигит.

Сув тинсагина у олиб чиқилиши мумкин. Ёш ўзбек талабалари давлатимиз раҳбарияти ва дипломатик корпуслардан ёрдам сўрамоқда. Kun.uz бу ҳақида аллақачон Ташқи ишлар вазирлигига сўров юборди. Биласиз, айни пайтда Болгарияда элчихона йўқ, бироқ бу давлат билан алоқалар ва бу давлатдаги ўзбеклар билан муносабатларга бош-қош дипломатлар бор. Ҳозир уларга вазият хабар қилинган.