Икки дугона суратга тушиш ва чўмилиш учун Оҳангарон сув омбори чеккасига тушиб, қайтиб чиқмаган. Учинчи қизни қутқариб қолган ўткинчи йигит воқеа тафсилотларини айтиб берди.
28 июл куни Оҳангарон сув омборида икки қиз чўкиб кетди, уларни қутқаришга уринган яна учинчи қиз ҳам ҳалок бўлишига оз қолган. Kun.uz мухбири воқеа жойига бориб, фожиа тафсилотларини ўрганди.
Қизлардан бирини қутқариб қолган йигит агар бир неча дақиқа олдин кўришганида, қолганларни ҳам қутқариб қолиш мумкин бўлгани ҳақида гапирди.
«Қизлар анча вақт ёрдам сўраб бақирган. Лекин на қоровул, на бошқаси эшитган», – дейди у.
Унинг сўзларига кўра, ушбу фожиа соат 12:40 ларда рўй берган.
«Мана шу жойга томоша қилгани келгандик, бир қиз сувда бақираётганини эшитиб қолдик. Кейин мен у ёқдан югуриб сувга тушдим-да, қизни олиб чиқдим. Ярим соатдан кейин тез ёрдам машиналари келди, хизматларини кўрсатишди. Агар 3-4 дақиқа олдин келганимизда, қолганларини ҳам қутқариб қолиш мумкин эди. Афсус, у қизнинг опаси ва дугонаси сувга ғарқ бўлган экан. Агар бу ерда қоровуллар бўлганида, қизлар бу аҳволга тушмас эди. Биз келганимизда ҳеч қанақа қоровул ҳам, қутқарув хизмати ходимлари ҳам йўқ эди», – дейди суҳбатдош.
Унинг сўзларига кўра, сув туби ботқоқлик бўлган.
«Мен ҳам биринчи қадамни босганимда тиззадан баландроқ жойга кириб кетдим. Ўзимни ўнглаб олдим. Шундан кейин у қизга қараб сузиб бориб, олиб чиқдим.
Ости 4-5 метр ботқоқлик бўлган. Бу қизлар ўша ботқоққа кириб кетаверган менимча. Буларни ботқоқ тортиб кетган. Сув ўзан ҳосил қилган. Шунда қизларни тортиб кетган.
У қиз ҳам опаларини қутқараман деб сувга тушган. Биз келган маҳал у ҳам сувда эди. Қутқариш учун ўзини ташлаган. Оқим қизни қирғоқдан 20-25 метр ичкарига олиб кетган», – дейди у.
Ҳолат юзасидан мазкур гидротехник иншоотларга масъул бўлган «Сувхўжаликназорат» инспекцияси вакили изоҳ берди. У қизлар сув омборининг назорат қилинмайдиган қисмидан сувга тушганини айтади.
«Сув омборининг дамба томонларини Миллий гвардия қўриқлайди, камералар қўйилган. У қизлар қирдан тушиб келган. У жойларни биз назорат қила олмаймиз», дейди инспекция вакили.
