Қўшимча функционаллар
-
Тунги кўриниш
7 та давлат Трампни тинчлик бўйича Нобел мукофотига номзод қилиб кўрсатди
Озарбойжон, Арманистон, Камбожа, Габон, Исроил, Покистон ва Руанда Оқ уй раҳбарини қўллаб-қувватламоқда.
Фото: Оқ уй
АҚШ президенти Доналд Трамп яна тинчлик бўйича Нобел мукофотига номзод бўлди. Энди унинг номзодини етти давлат қўллаб-қувватлаяпти, деб хабар берди Оқ уй.
Доналд Трамп номзоди тарафдорлари орасида Озарбойжон президенти Илҳом Алиев, Арманистон бош вазири Никол Пашинян, Камбожа бош вазири Хун Сен, Габон президенти Браис Олиги Нгема, Исроил бош вазири Бинямин Нетаняҳу, Покистон ҳукумати ва Руанда ташқи ишлар вазири Оливе Ндухунгирехе бор.
Июнь ойида Жоржия штатидан республикачи конгрессмен Бадди Картер президент Доналд Трампни Исроил ва Эрон ўртасидаги қуролли можарони тўхтатишдаги «алоҳида ва тарихий ролини» таъкидлаб, уни тинчлик бўйича Нобел мукофотига номзод сифатида кўрсатишни таклиф қилган эди. Унинг сўзларига кўра, АҚШ президенти терроризмнинг энг йирик ҳомийси бўлган Эроннинг сайёрадаги энг ҳалокатли қуролга эга бўлишининг олдини олишга ҳисса қўшган.
Аввалроқ Покистон ҳукумати Ҳиндистон билан можарони ҳал қилишда воситачилик қилгани учун Доналд Трамп номзодини тинчлик бўйича Нобел мукофотига илгари сурган эди.
Калифорниялик республикачи, вакиллар палатаси аъзоси Даррелл Исса жорий йил бошида Трампни мукофотга номзод қилиб кўрсатган ва унинг 2024 йилги сайловдаги ғалабаси бутун дунё тинчлигига «ҳайратланарли даражада самарали таъсир кўрсатганини» айтган эди.
Трамп ўзини тинчлик бўйича Нобел мукофотига лойиқ деб ҳисоблайди, бироқ «уни ўзига ҳеч қачон беришмайди», деган фикрда.
Нобел мукофоти сайти маълумотларига кўра, ҳозир 2025 йилги тинчлик бўйича Нобел мукофотига 338 нафар номзод илгари сурилган.
