Жиззах вилоятида янги аэродром қурилди

Айдаркўл қирғоғидаги аэродромнинг йўлагини CASA C295W ҳарбий транспорт самолёти синовдан ўтказди.

Фото: Видеодан кадр

L-410 ва ATR-72 минтақавий самолётларининг пайдо бўлиши билан Ўзбекистонда янги аэропортлар фаол ривожлана бошлади. Сўнгги йилларда Зомин, Қўқон, Сариосиё биринчи самолётларни қабул қилиб олди, энди уларга яна бир аэродром - Арнасой қўшилди, деб хабар берди AvroRJ’s SKY.

Аэродром Жиззах вилоятидаги Айдаркўл қирғоғида жойлашган. Учиш-қўниш йўлаги узунлиги 1700 м × 30 м, курс 12/30, L-410 ва ATR-72 самолётлари учун мўлжалланган иккита тўхтаб туриш жойи, терминалга эга.

Биринчи бўлиб янги йўлакни CASA C295W ҳарбий транспорт самолёти синовдан ўтказди - айнан у Арнасойга қўнишлар ҳисобини очди.

Аэродром келажакдаги курорт мажмуаси учун транспорт тугунига айланиши, минтақани сайёҳлар учун очиши кутилмоқда.

Аввалроқ, Жиззахнинг «Айдар-Арнасой» кўллар тизими қирғоқ бўйида замонавий туризм маркази барпо этилиши ҳақида хабар берилган эди.