Вэнс: Россия Украина масаласида «катта ён босди»

АҚШ вице-президенти Жей Ди Вэнснинг таъкидлашича, Россия Украинадаги урушни тугатиш учун «катта ён босди». Унга кўра, Москва «урушдан кейин Украина ҳудудий яхлитликка эга бўлишини» тан олган.

Фото: Kayla Bartkowski / Getty Images

Россия Доналд Трампга Украинадаги урушни тугатиш бўйича ўз талаблари бўйича «катта ён босди». Бу ҳақда АҚШ вице-президенти Жей Ди Вэнс 24 август, якшанба куни Американинг NBC телеканалида намойиш этилган «Кристен Уэлкер билан учрашув» ток-шоуси учун олдиндан ёзиб олинган интервюсида айтиб ўтди.

Вэнснинг сўзларига кўра, Америка президенти Россиянинг Украинага қарши урушини тўхтатиш мақсадида Москва ва Киев билан «жуда агрессив, ўта кучли дипломатия» олиб бормоқда, муросали ечим топишга ҳаракат қилмоқда. «Ўйлайманки, руслар 3,5 йил давомида бу можародан сўнг биринчи марта президент Трампга жиддий ён берди», — деди Вэнс. «Улар ҳақиқатан ҳам ўзларининг баъзи асосий талабларида мослашувчан бўлишга тайёр эди».

Хусусан, АҚШ вице-президентининг сўзларига кўра, Москва «урушдан кейин Украина ҳудудий яхлитликка эга бўлишини» тан олган. У ҳарбий ҳаракатлар тугаганидан кейин Россия қайси ҳудудларни Киев назорати остида қолдиришга тайёрлигини аниқлаштирмади. Бундан ташқари, унинг сўзларига кўра, Россия «Киевда қўғирчоқ режим ўрната олмаслигини тан олган». «Яна, улар жиддий ён босдими? Албатта, йўқ. Лекин биз ўзгаришга эришмоқдамиз», — дейди Вэнс.