Қўшимча функционаллар
-
Тунги кўриниш
FT: Трамп Хитой тинчликпарвар кучларини Украинага юборишни таклиф қилди
Урушдан кейин Украинадаги фронт чизиғи бўйлаб нейтрал ҳудудни назорат қилиш учун Хитой қўшинларидан фойдаланиш ғояси АҚШ президенти томонидан Оқ уйда Европа етакчилари билан учрашувда илгари сурилган, деб хабар беради FT манбалари.
Фото: REUTERS
29 август, жума куни Financial Times газетасининг муҳокамалар бўйича маълумот берган тўрт кишига таяниб ёзишича, АҚШ президенти Доналд Трамп Хитой қўшинларини Украинага тинчликпарварлар сифатида киритиш зарур деб ҳисоблайди. Айтилишича, Трамп шу тариқа Россия президенти Владимир Путиннинг таклифини қўллаб-қувватлаган.
Газетанинг манбаларига кўра, 18 август куни Оқ уйда Украина президенти Володимир Зеленский ва Европа етакчилари билан учрашувда Трамп Хитойдан Россия билан тинчлик келишуви доирасида 1300 километрлик фронт чизиғи бўйлаб нейтрал ҳудудни назорат қилиш учун тинчликпарвар кучларни тақдим этишни сўрашни таклиф қилган.
Оқ уй бундай фикр муҳокама қилинганини рад этди. «Бу ёлғон», деди Трамп маъмуриятининг юқори мартабали амалдори FT'га.
Газетанинг қайд этишича, Россия томони биринчи марта 2022 йил баҳорида Истанбулда Россия ва Украина ўртасида бўлиб ўтган биринчи музокаралар чоғида хавфсизлик кафолати доирасида Хитой тинчликпарвар кучлари масаласини кўтарган. Axios нашрига кўра, Путин 15 август куни Аляскада Трамп билан учрашувда Украина хавфсизлигининг эҳтимолий кафолатчиларидан бири сифатида Хитойни тилга олган.
