Олий суд раисининг биринчи ўринбосари ўзгарди

Икром Муслимов Олий суд раисининг биринчи ўринбосари – Судлов ҳайъати раиси лавозимидан озод этилди. Унинг ўрнига Алишер Отахонович Усмонов (суратда) тайинланди. Президент администрацияси раҳбарининг ўринбосари лавозимига ўтган Нодира Ҳакимова Олий суд судялари қаторини тарк этди.

Алишер Усмонов / Фото: Сенат матбуот хизмати

Ўзбекистон Олий суди раисининг биринчи ўринбосари – Судлов ҳайъати раиси Икром Тўхтамуродович Муслимов лавозимидан озод этилди.

Сенатнинг 5 сентябр кунги қарори билан, ушбу лавозимга Алишер Отахонович Усмонов 5 йил муддатга сайланди. У бунгача Наманган вилояти судининг раиси сифатида ишлаб келаётганди.

Шунингдек, Сенат қарори билан, Нодира Жалоловна Ҳакимова Олий суд судяси лавозимидан озод этилди. У июл ойида Президент администрацияси раҳбарининг суд тизимини ислоҳ қилиш бўйича ўринбосари этиб тайинланган, август ойида эса давлат раҳбарига суд тизимидаги ўзгаришларни тақдимот қилганди.

Тайёрлаган: Комрон Чегабоев

#суд #Алишер Усмонов #Олий суд #тайинлов #Икром Муслимов #Нодира Ҳакимова