Мерино туркларни яксон этди, Қозоғистон ҳам 6 та жавобсиз гол ўтказди. Кун ўйинлари
|17:36 / 08.09.202515 82912 мин
Қозоғистон бош мураббийи Али Алиев қаторасига тўрт мағлубиятдан кейин истеъфога чиқмоқчи. ЖЧ-2026 саралаши доирасида Европада якшанба куни ўтказилган ўйинлар ва гуруҳлардаги вазият.
Испания саралашдаги иккинчи ўйинини ҳам сафарда ўтказди, Луис де ла Фуэнте эса уч кун олдин Болгарияда ўйнаган бошланғич таркибга бирорта ўзгартириш киритмади. Мураббийнинг бу қарори Билбаодагиларда норозилик уйғотиши тайин, Нико Уилямс биринчи бўлим охирида жароҳат туфайли алмаштирилди. У майдондалигидаёқ ўйин тақдири ҳал қилиб бўлинганди, «Қизил фурия» дарҳол турклар дарвозасини қамал қилди ва тезкор гол билан ҳисоб очилди. 6-дақиқадаёқ Педри Ҳоқон Чалхонўғлини алдаб ўтиб, тўпни олис бурчакка аниқ йўналтирди.
Бўлим ўрталарида урилган иккинчи голни эса мактаб дарсликларига киритиш мумкин – чап қанот орқали ривожлантирилган ҳужумда меҳмон футболчилар машғулотлардагидек эркин ҳаракат қилиб, жарима майдони ичида ҳам аниқ паслар билан рақибни шошириб қўйишди ва бу ҳужумни Мерино аниқ зарба билан якунлади. Микелнинг бўлимга қўшиб берилган дақиқаларда урилган иккинчи голи ҳақида ҳам шундай таърифни ишлатиш мумкин, иккинчи бўлим бошида жарима майдони ташқарисидан чап оёғида айланма зарба билан яна бир шедевр гол муаллифига айланди. У 2025 йил бошидан буён терма жамоа сафида олти ўйинда олти голга муаллифлик қилган. Ушбу яримҳимоячи ўтган мавсумда «Арсенал»да ҳужумчи қолмаганида Артета томонидан мажбуран ҳужумчи позициясида ўйнатилгани терма жамоага қўл келмоқда.
Испания учун бу жаҳон чемпионатлари саралаш босқичларида сафарда қозонилган энг йирик ғалабалардан бири бўлди. 2005 йилда Сан-Маринога қарши ўйинда ҳам худди шундай ҳисоб қайд этилган, рекорд кўрсаткич эса 2017 йилда Лихтенштейн дарвозасига жавобсиз саккизта гол урилиши бўлганди. Аммо бу рақибларни Туркия билан тенглаштириб бўлмайди. Яничарлар учун бу 41 йилдан буён уйдаги энг оғриқли мағлубият бўлди — ўшанда Англияга 0:8 ҳисобида мағлуб бўлинган.
Гуржистоннинг ўтган турда ўз уйида Туркияга мағлубияти ўта оғриқли қабул қилинди. Ўша ўйинда Вилли Санйол шогирдлари ҳисобдаги учта гол фарқини йўққа чиқариши ва саралашни очко олиш билан бошлаши ҳам мумкин бўлганди, аммо бунга вақт етмади. Қаторасига иккинчи ўйинда эса барчаси биринчи бўлимдаёқ ҳал бўлди. Ўтган турда турклар дарвозасига иккинчи голни урган Хвича Кварацхелия Болгария дарвозасини ҳам ишғол этиб, терма жамоа сафидаги 20-голини нишонлади, бўлим охирида эса меҳмонларнинг яна бир хатосидан Давиташвили унумли фойдаланди ва Гагнидзени голли пас билан таъминлади. Иккинчи бўлим ўрталарида Жорж Микаутадзе якуний ҳисобни ўрнатди. Катта эҳтимол билан, гуржилар турклар билан иккинчи ўрин учун кураш олиб боришади.
11 октябр. Болгария – Туркия, Испания – Гуржистон.
14 октябр. Туркия – Гуржистон, Испания – Болгария.
Ишончсиз старт ва Словакиядаги мағлубиятдан кейин немислар қаттиқ танқидга учради. Натижада Юлиан Нагелсманн шогирдлари майдонга катта иштиёқ билан чиқиб келишди ва тезкор гол уришди. 7-дақиқада Волтемаде тўп учун курашда устун чиққач, Гнабри яккама-якка вазиятдан фойдаланди. Аммо мезбонлар муваффақиятни ривожлантира олишмади ва Шимолий Ирландия бурчак зарбасидан кейин ҳисобни тенглаштирди. Бу вазиятда Гнабри жавоб голи муаллифи Прайсни қўриқлай олмади.
Лекин Германия иккинчи бўлим бошидаёқ ўйиндаги интригага барҳам берди. Меҳмонлар дарвозабони Пикок-Фаррелл аввалига Вирцнинг яқин масофадан йўллаган зарбасини қайтарди, аммо кўп ўтмай яққол хатога йўл қўйди. Дарвозабон ва ҳимоячилар бор эътиборини Раумнинг узоқ масофадан берган пасига ета олмаган Байерга қаратишганди, илдамроқ ҳаракат қилган Амири эса бўш дарвозани ишғол этди. Кейин эса Флориан Вирц жарима зарбасини ажойиб ижро этди ва рақибни узил-кесил таслим этди.
Словаклар эса барча куч ва ҳиссиётларини Германия билан ўйинда қолдиргани маълум бўлди. Люксембург жиддий рақобат кўрсатди ва Франческо Калцона жамоасидаги муаммолар кўриниб қолди. Аввалига Дубравканинг хатосидан кейин Муратович жазолаши мумкин эди, кейин эса меҳмонлар дарвозаси олдида хавфли вазиятлар тизимли тус олди. Биргина Синанининг ўзида икки зарба устунга борди. Люксембург бутун ўйин давомида яхши ҳаракат қилди, аммо якунда гол ўтказиб юборди. Жокерлар Словакияга қаторасига иккинчи ғалабани тақдим этишди. 90-дақиқада Туптанинг зарбасидан кейин мезбонлар дарвозабони Антони Морис хатога йўл қўйиб, ўзига келган тўпни қаршисига ташлаб берди, Риго эса бу совғадан фойдаланди.
10 октябр. Шимолий Ирландия – Словакия, Германия – Люксембург.
13 октябр. Шимолий Ирландия – Германия, Словакия – Люксембург.
Ўтган турда Полша билан уй ўйинида ғалабани қўлдан бой берган нидерландияликлар бор аламини Литвадан олиши кутилганди. Депайнинг тезкор голи ҳам бу фикрни тасдиқлаётганди, бўлим давомида Квентин Тимбер меҳмонларнинг устунлигини мустаҳкамлади. Аммо Болтиқбўйи жамоаси сафида воқеаларнинг бундай ривожига қатиъян қарши бўлган футболчи топилди. «Торино» сафида ўйнаётган Гинейтис Малта билан ўйинда Литвага дуранг келтирганди, энди эса Нидерландияга қарши ўйинда бурилиш ясашига сал қолди.
У аввалига ерлатиб бурчакка йўллаган зарбаси билан ҳисобни қисқартирди, бўлим охирида эса жарима майдони марказидаги Гирдванисни голли пас билан таъминлади ва ҳисоб қисқа муддат ичида 0:2 дан 2:2 кўринишига ўзгарди. Фаворитлар анчагача вазиятни ўз томонига оғдира олмади ва фақат 64-дақиқада яна шу Депай ўзини кўрсатди. У Думфриснинг қанотдан узатмасини голга айлантириб, жамоасига ғалаба келтирди. Шу билан бирга, Робин ван Персини ортда қолдирган ҳолда Нидерландия тарихидаги энг яхши тўпурарга (52 гол) айланиб олди.
Ёзда поляклар финнларга ютқазганди (1:2), аммо ўшанда мураббий ҳам бошқа эди, Роберт Левандовски эса таркибга жалб этилмаётганди. Мураббий алмашгач, таркибга қайтган «Барселона» форварди биринчи бўлим охирида дарвозабон билан яккама-якка вазиятдан фойдаланиб, ҳисобни ишончли кўринишга келтирди. Унгача Мэтти Кэш ҳисобни очганди — ушбу ҳимоячи қаторасига иккинчи ўйинда ўз номини таблога ёздириб қўймоқда.
Иккинчи бўлим бошида мезбонлар рақибни узил-кесил таслим этишди. Энди поляклар гуруҳ жадвалида финнларни қувиб ўтган ҳолда иккинчи ўринга кўтарилди.
Бешинчи тургача уч ўйинда ютқазган ва гуруҳдан чиқиш имкониятини пасайтириб юборган Қозоғистондан курашни давом эттириш учун Белгия майдонидан очко билан қайтиш талаб этиларди. Осиёликлар деярли бир бўлим давомида курашишди, аммо 42-дақиқада Кевин Де Брюйне жарима майдони ташқарисидан олис тўққизликни аниқ нишонга олиб, меҳмонлар мудофаа деворини ёриб ўтди. Икки дақиқа ўтиб эса айнан у Жереми Докуни голли пас билан таъминлади. «Манчестер Сити» футболчиси танаффусдан кейин ҳам тўхташ ҳақида ўйламади ва дублни расмийлаштириб, битта голли пасни ҳам ўз ҳисобига ёзиб қўйди. Ўйин охирларида Де Брюйне ҳам иккинчи голини урди, ҳимоячи Мене эса 87-дақиқада якуний ҳисобни ўрнатди - 6:0.
Саралаш босқичини кечроқ бошлаган белгияликлар иккинчи ўринда ва Шимолий Македонияни таъқиб қилишда давом этмоқда. Қозоғистон эса йўлланмадан деярли умид узди. Қаторасига тўртинчи мағлубиятдан кейин жамоа бош мураббийи Али Алиев натижа учун бор жавобгарликни ўз зиммасига олишини ва истеъфога чиқиш учун ариза ёзишини маълум қилди.
Шимолий Македония терма жамоаси ҳамон гуруҳ жадвалини бошқармоқда. Болқонликлар ҳали бирор марта ютқазмаган — уч ғалаба ва икки дуранг. Бу сафар барчаси силлиқ кечди, жамоа ўз майдонида «карлик»ларни тор-мор этди, Энис Барди «гол+пас» тизимида 2 (1+1) очко ишлади. Эътиборли жиҳати, шимолий македонияликлар беш голдан тўрттасини танаффусдан кейин уришди.
10 октябр. Қозоғистон – Лихтенштейн, Белгия – Шимолий Македония.
13 октябр. Шимолий Македония – Қозоғистон, Уэлс – Белгия.
