Постларда салкам 17 тонна ноқонуний косметика ва парфюмерия воситалари аниқланди

Божхона қўмитасининг Контрабандага қарши курашиш бошқармаси томонидан Андижон вилояти божхона бошқармаси тезкор тузилмалари ҳамда «Дўстлик» чегара божхона пости ходимлари билан ҳамкорликда ўтказилган тезкор тадбирда тадбиркорлик субъектларидан бирининг номига келтирилган парфюмерия воситалари белгиланган тартибдан божхона кўригидан ўтказилди.

Натижада, юклар орасидаги 9 турдаги 10,7 тоннадан зиёд парфюмерия воситалари ҳужжатларда кўрсатилганидан ортиқча эканлиги фош бўлди. Ҳолатга ойдинлик киритилгунига қадар вақтинча сақловга олинган мазкур товарларнинг умумий қиймати, дастлабки ҳисоб-китобларга кўра, салкам 1,9 млрд сўмни ташкил қилмоқда.

Мазкур постда аниқланган яна бир ҳолатда қўшни давлатдан кириб келган юк автотранспорт воситаларидан бирини божхона кўригидан ўтказиш давомида божхоначилар мавжуд юклар ва ҳужжатлардаги маълумотлар ўртасида тафовут борлигини аниқлади.

Натижада товарлар орасидаги қиймати 216 млн сўмлик 800 кг оғирликдаги косметика ва парфюмерия воситалари ҳужжатларда қайд этилмагани фош бўлди.

Парфюмерия воситаларини ноқонуний олиб киришга уриниш пойтахтда ҳам фош қилинди. Божхона қўмитасининг Контрабандага қарши курашиш бошқармаси ва Тошкент шаҳар божхона бошқармаси ходимлари томонидан аниқланган ҳолатда ҳам тадбиркорлардан бирининг четдан келтирилган товарлари белгиланган тартибда кўздан кечирилди.

«Тошкент-товар» ташқи иқтисодий фаолият божхона постида ўтказилган божхона кўриги натижасида 53 номдаги парфюмерия ва бошқа уй-рўзғор буюмлари божхона юк декларациясида кўрсатилмагани, айримлари эса кўрсатилганидан кўра ортиқча эканлиги аниқланди. 5,4 тоннадан зиёд мазкур товарларнинг умумий қиймати эса 1,2 млрд сўмдан ошмоқда.