Навалний жамоаси сиёсатчи ўлими ҳақида янги маълумотлар эълон қилди

Россия мухолифати етакчиси, марҳум сиёсатчи Алексей Навалний жамоаси унинг ўлими билан боғлиқ шов-шувли хабар эълон қилди. Сиёсатчининг хотини Юлия Навалнаяга кўра, камида иккита давлатдаги лаборатория Алексей заҳарлаб ўлдирилганини тасдиқлаган. ФБК собиқ раиси Иван Жданов эса Навалний ўлган камерада ўша куни олинган суратларни эълон қилди.

{Yii::t(}

Ўтказиб юбориш 6s

Ўтказиб юбориш

«Путин бевосита айбдор»

Аввалига Юлия Навалная видеомурожаат қилиб, эри ўлдирилгани, бу учун шахсан Россия президенти Владимир Путин айбдор эканини айтди. Навалнаянинг айтишича, сиёсатчининг жамоаси унинг биологик намуналарини икки Ғарб давлатидаги лабораторияга юборган ва улар бир-биридан мустақил тарзда Навалний заҳарлаб ўлдирилган деган хулосага келган. Сиёсатчининг беваси бу лабораториялардан анализ натижаларини эълон қилишни сўраган.

«Россия махсус хизматларини тақиқланган биологик қуролдан фойдаланишда айблайман. Текширув ўтказган лабораториялардан натижаларни эълон қилишни талаб этаман. Путин билан ўйин ўйнашни бас қилинг, сиз жим турар экансиз, улар тўхтамайди», деган Навалная.

Кейинроқ Навалний жамоаси унинг камерасидан ўлим куни олинган суратни эълон қилди. Расмда Навалний хонада жуда кўп миқдорда қусганини кўриш мумкин. Сурат сиёсатчи жасадини олиб чиқишлари билан олинган. Навалний ўлган Харп қишлоғидаги қамоқхонанинг камида беш нафар ходими кўрсатма бериб, у вафоти олдидан қорнида оғриқ сезгани, қаттиқ қалтирагани ва қусганини айтган. Бу ҳақда қамоқхона маъмуриятига хабар берилган бўлса-да, камерага тез ёрдам 40 дақиқа ўтиб етиб борган.

16-камера

Яқинда Алексей Навалний асос солган коррупцияга қарши кураш фонди – ФБК директорилигидан кетган Иван Жданов ўз саҳифасида камерадан ўлим куни олинган яна бошқа суратларни эълон қилди. У ерда ҳам бир кишилик камерада Навалнийнинг шахсий буюмлари сочилиб ётгани, бутун хонада қусиш аломатлари борлиги кўринади.

«Бу 2024 йил 16 феврал куни Алексей Навалний ўлдирилган 16-камерадан олинган сурат. У полда ўлиб қолган. Биологик намуналарни олиб чиқиш ҳақида алоҳида гаплашармиз, у ерда бор-буди билан таваккал қилган қаҳрамонлар бор эди», деб ёзди Жданов ўз каналида.

Чиндан Навалний ўлган қамоқхона ходимлари Россия ҳукуматининг энг асосий мухолифи сақланган камерани суратга олгани, уни қўрқмай Навалний жамоасига юборганига қойил қолиш керак. Ахир Навалний Россияда террорчи деб эълон қилинган, ҳатто унинг жанозасига бориш хавфли эди. Аммо қамоқхонадагилар унинг жасади олиб кетилган хонани ҳали тозалаб кетмасидан суратга олишган, кейин катта эҳтимол яна ўша қамоқхонадагилар бионамуналарни чет элга олиб чиқишга ёрдам берган.

Навалнийнинг ҳар бир қадами кузатилган, ёнига маҳбус кўринишида қўриқчилар, провокаторлар қўйилган, қамоқхона ходимлари ҳам саралаб олинган шароитда ҳам ўлим сирини очишга ёрдам берадиганлар топилгани Навалний оддий рус жамияти учун қанчалик катта шахс бўлгани, унинг обрўси қанчалик баланд бўлганини кўрсатади.

Маълумот учун, Алексей Навалний 2024 йил 16 феврал куни олис Сибирдаги Харп қишлоғида жойлашган қамоқхонада ўлганди. У 2020 йил 20 август куни Томскдан Москвага учаётганда самолётда заҳарланиш аломатлари билан ҳушидан кетганди. Ўшанда уни «Новичок» моддаси билан заҳарлашган деган хулосага келишади. Сиёсатчининг яқинлари уни Германияга олиб кетиб даволашади.

2021 йил 17 январ куни Навалний Россияга қайтади. Уни қайтиши билан қамоққа олишади, шундай бўлиши аниқ эди, лекин Навалний Путин ҳақида суриштирувини Россиядан туриб эълон қилиш учун ватанига қайтади. Сиёсатчи қамоққа олинганидан бир кун ўтиб Путиннинг саройи номли шов-шувли суриштирув эълон қилинади. Ютубда бу видео ҳозиргача 134 миллион марта томоша қилинган. Бу Алексейнинг охирги журналистик ва сиёсий суриштируви бўлиб тарихда қолганди.

Шу-шу қамоқхонадан Навалнийнинг ўлиги чиқди. Кўпчилик тахмин қилганидай. Аввалига унинг жасадини ҳам яқинларига беришмади, лекин сиёсатчининг онаси қамоқхонадан узоқлашмай боласининг жасадини олиб кетди. Россия мухолифати етакчиси Алексей Навалний 2024 йил баҳори илк кунида она шаҳри Москвада ўзи ёқтирган «Терминатор» филми мусиқаси билан дафн қилинганди.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.