Европарламент собиқ депутати Россия манфаати учун пора олганини тан олди

Британиялик сиёсатчи Нейтан Гилл россияпараст фаол Олег Волошиндан пора олиб, Европарламентда Россия фойдасига баёнотлар берган.

Фото: Dragan Maksimović/DW

Европарламентнинг собиқ аъзоси ва Уэлсдаги ўнг популистик Reform UK партияси собиқ раҳбари Нейтан Гилл Россиянинг Европадаги сиёсий манфаатларини илгари суриш эвазига пора олганини тан олди. Reuters агентлигининг хабар беришича, сиёсатчи буни 26 сентябр, жума куни Лондондаги Олд-Бейли суд залида тан олган.

52 ёшли Гилл 2018 йилнинг январидан 2019 йилнинг июлигача олган маблағлари билан боғлиқ саккизта порахўрлик бўйича айбини тан олди. Сиёсатчи пулни олишга рози бўлган, «бу ўз вазифаларини бажаришда... сайланган лавозимдаги нотўғри хатти-ҳаракат бўлди», дея суд залидаги нутқидан иқтибос келтиради Reuters.

Судя Бобби Чима-Грабб таъкидлаганидек, Гилл унга Украинадаги уруш контекстида «россияпараст партияларни қўллаб-қувватлаш учун» Европа парламентида саволлар ва баёнотлар бериш учун пул олганини тан олган. Прокурор Марк Хейвуднинг сўзларига кўра, Гилл бошқа нарсалар қатори Европарламентда ўзига керакли масалаларни кўтариш ва манфаатини кўзлаб тадбирлар ўтказиш учун пул олган. Сиёсатчи 2020 йилда, Буюк Британия ЕИдан чиққанидан кейин Европарламентни тарк этган.

Британиялик ўнг популистга қарши айбловлар унинг телефонидаги WhatsApp мессенжери иловасида айбловчи хабарлар топилганидан бир йил ўтиб қўзғатилди.

Ноябрга режалаштирилган ҳукм чиқарилгунга қадар Гилл суд залидан гаров эвазига озод қилинди. Судянинг таъкидлашича, уни «узоқ муддатли қамоқ жазоси» кутмоқда.

Тайёрлаган: Отабек Матназаров

#Россия #Европарламент