Турни шу куни ўзига хос бўлмаган қора-сариқ рангли формада майдонга тушган «МЮ» очиб берди. Клуб бу рангларда 90-йиллар бошларида, ўз тарихида илк бор кетма-кет икки чемпионликка эришган даврида ўйнаган. Аммо бу ҳам жамоага ёрдам бермади ва ўйин стартидаёқ тезкор гол ўтказиб юборилди. Ҳужумда тўп йўқотилгач, Ҳендерсон ўз жамоаси жарима майдони яқинида туриб узун пас узатди, Магуайр сунъий офсайд ҳолати юзага келтиришга улгурмади ва тўпни бошда ўзига бўйсундириб олган Игор Тиаго кучли зарба билан яқин «тўққизлик»ни нишонга олди.
Кейинроқ бир неча ажойиб сейвлар амалга оширган Байиндирда бу вазиятда имконият йўқ эди. Кўп ўтмай Тиаго қайтган тўпни дарвозага киритиб юбориб, дублини расмийлаштирганида ҳам.
20-дақиқага келиб икки гол фарқи билан ортда қола бошлаган меҳмонларда ҳеч қандай имконият қолмагандек кўринганди. Аммо «қизил иблислар» тезда ўзига келишди ва ҳисобни қисқартиришди. Қарши ҳужумда Патрик Доргу тўпни жарима майдонига етказиб берганида, тартибсизлик юзага келди ва «МЮ»нинг ёздаги харидларидан бири Бенямин Шешко учинчи уринишда тўпни дарвозага йўллаб, дебют голини нишонлади.
Иккинчи бўлим бошида «Брентфорд» яна рақибдан яхшироқ бошлади ва кетма-кет ҳужумлар уюштирди. Лекин гол кўпроқ меҳмонларга зарур эди ва Рубен Аморим 66-дақиқада иккиталик алмаштириш амалга оширди. Лени Йоро шу куни юқори ҳимоя чизиғида яхши ҳаракатлана олмаган Магуайрнинг ўрнига тушди. Таянч яримҳимоячиси Мануэл Угарте эса ҳужум вакили Кобби Майнуга ўрнини бўшатиб берди.
Шу куни мезбон мухлислар томонидан ҳуштакбозликка учраган Брайан Мбемо 76-дақиқада «МЮ» учун пеналти ишлади. VAR бу эпизодни Нейтан Коллинзни майдондан четлатиш эҳтимоли бўйича жиддий кўриб чиқди, аммо футболчига кўрсатилган сариқ карточка етарли деб топилди.
Мавзуга оид
Нуқтага «МЮ» сардори Бруну Фернандеш яқинлашди, аммо у бу мавсумда иккинчи бор 11 метрдан муваффақиятсиз зарба берди. Келлеҳер эса ўз дарвозасига белгиланган сўнгги бешта пеналтидан учтасини қайтармоқда. Бу эпизод амалда ўйин тақдирини ҳал қилди. Қолган вақт давомида «Юнайтед» босим қилишга уринди, аммо чинакамига хавфли вазият ярата олмади. Ўйинга қўшиб берилган дақиқаларда эса «Брентфорд» қарши ҳужумда учинчи голни ҳам урди. «Манчестер Юнайтед» 2024 йил май ойидан буён АПЛда қаторасига икки ғалабага эриша олмаяпти. Аморим ўжарлик билан ўзининг 3-4-3 схемасидан воз кечмасдан, ўз истеъфосини яқинлаштирмоқда. Португалиялик мутахссис «МЮ» бошқарувида АПЛнинг 33 ўйинида ишлади. Жамоа унинг бошқарувида фақат тўққиз ўйинда ғалаба қозонган, етти бор дуранг ўйнаб, 17 ўйинда мағлубиятга учраган.
«Брентфорд» эса ёзда «Тоттенҳэм» бошқарувига йўл олган Томас Франксиз ҳам, собиқ жамоадошларига қарши ўйнаган Мбемосиз ҳам, Исак ўрнига «Нюкасл»га ўтиб кетган Виссасиз ҳам, жамоа сардорлигидан «Арсенал»нинг захира ўриндиғини афзал кўрган Норгарсиз ҳам АПЛда муносиб иштирок этмоқда.
«Ливерпул» бу мавсумда мухлисларини энг қийин вазиятлардан чиқиб кетишига ўргатиб қўйганди. Бу ўйинда ҳам ҳисоб 0:1 ҳолатида кўпчилик барчаси ўйин охирида ҳал бўлишини кутаётганди. Ўйин давомида Алиссон жуда кўп марта қутқарди ва интригани сақлаб турди. Лондонликлар барча жабҳаларда пешқадамдан устун эди: жами зарбалар (10:6), дарвоза соҳасига тўғри борган зарбалар (4:2), тўпни олиб қўйишлар (13:1) ва ҳатто муваффақиятли финтлар (4:2) бўйича ҳам.
Лекин 87-дақиқада шубҳали вазиятда Киеза ҳисобни тенглаштирди: тўп унга қўли билан ўйнаган Салоҳдан келди, VAR хонасидаги ҳакамлар эса бу қоидабузарликни кўришмади.
Шундан кейин «Кристал Пэлас» ҳам сўнгги дақиқалар қурбонига айланадигандек кўрина бошлади. Аммо лондонликлар нафақат ютқазмасликни, балки мавсум стартидаги беш ўйинда беш ғалабага эришган чемпионни уларнинг услубида нокаутга учратишни уддалади. Ўйинга қўшиб берилган еттинчи дақиқада мезбонлар аут ижросидан кейин меҳмонлар мудофаасини доғда қолдиришди ва Нкетиа яқин масофадан туриб тўпни дарвозага йўллади. Унга ассистни ёзги трансферларнинг охирги кунида «Ливерпул»га ўтиши амалга ошмай қолган ҳимоячи Марк Геҳи бергани драмани янада кучайтирди. Мавсумдаги илк мағлубиятдан кейин ҳам мерсисайдликлар турнир жадвалининг биринчи ўрнида қолишди, «Пелас» эса ҳозирча иккинчи ўринга кўтарилди.
Оливер Гласнер жамоаси қаторасига ўн саккиз ўйинда мағлуб бўлмаган ҳолда ўтган асрда ўрнатилган клуб рекордини такрорлади. Агар фақат АПЛ ўйинлари ҳисобга олинса, «бургутлар» ўз тарихида илк бор 12 ўйиндан иборат мағлубиятсиз сериясини давом этмоқда ва бу мавсумда ҳам ҳали ютқазмаган ягона жамоа бўлиб қолмоқда.
«Манчестер Сити» эса «Бёрнли»ни сўнгги дақиқалардаги голлар эвазига йирик ҳисобда мағлуб этди. Ўйиннинг энг омадсиз футболчиси меҳмонлар ҳимоячиси Эстев бўлди — у икки бор ўз жамоаси дарвозасини ишғол этиб қўйди. АПЛнинг бутун тарихида бундай ҳолат фақат олти бор кузатилган. Ўйиннинг энг яхши футболчиси мақомини эса қўшимча дақиқаларда дублни расмийлаштирган Ҳоланд илиб кетди. Эрлинг ўйин тақдирини ҳал қилмади, аммо турнир тарихидаги энг яхши норвегиялик тўпурарга айланиб олди. «Шаҳарликлар» форварди «МЮ»нинг собиқ ҳужумчиси Уле-Гуннар Сулшерни қувиб ўтиб, лигадаги голлари сонини 97 тага етказиб олиши учун 103 ўйин етарли бўлди.
Шу куни «Челси» ҳимоячиси Чалобанинг фаолиятидаги энг ёмон ўйинлардан бири бўлди. У майдондан четлатилган 53-дақиқага қадар кўклар жамоаси ҳисобда олдинда бораётган ва навбатдаги ғалабани расмийлаштиришига кўпчилик шубҳа қилмаётганди. Аммо «Стэмфорд Бриж» мезбонлари камчилик бўлиб қолгач, ҳисобдаги устунлигини сақлаб қололмади. Аввалига захирадан тушган Уэлбек мувозанатни тиклади, у Минтенинг ажойиб узатмасидан кейин дарвозабон ҳудудида турган ҳолда аниқ зарба бериши етарли эди. Ўйин охирида эса лондонликлар кучли босимга дош бера олмади. Қанотдан амалга оширилган яна бир ҳужум Виффер тўпни қулай позицияда турган Де Кайперга ташлаб бериши ва жароҳатдан тузалиб сафга қайтган ҳимоячи ғалаба голини уриши билан якунланди. «Челси» сардори Жеймснинг пеналти ишлашга уриниши бесамар кетганида, «Брайтон» прессинг билан тўпни олиб қўйди ва Уэлбек иккинчи голини урди. Энди охирги уч ўйинда атиги бир очко ишлаган Энцо Мареска шогирдлари турнир жадвалининг саккизинчи ўрнига тушиб кетди.
Шанба кунги Мадрид дербиси Испанияда бошқа воқеаларни сояда қолдирди. Лекин шу куни «Вилярреал» ЕЧЛ йўлланмаси учун курашдаги асосий рақибларидан бири «Атлетик» билан орани очиқ қилди. Минимал ҳисобдаги ғалабадан кейин «сариқ субмариналар» учинчи ўринни мустаҳкамлади ва энг яқин таъқибчиси «Атлетико»ни тўрт очколик фарқ билан ортда қолдира бошлади. Шу билан бирга, Марселино Торал жамоаси натижани олдинроқ ҳал қилиши ҳам мумкин эди, аммо Пепе Бюкенен ташлаб берган тўпни бир неча метр масофадан туриб дарвоза тўрига кирита олмади. Молейро эса тўпга қандай мослашиш бўйича ивуарлик жамоадошига сабоқ берди ва тўп ноқулай келганига қарамай, уни устун ёнидан дарвоза тўрига киритди. «Вилярреал» учун навбатдаги синов, ЕЧЛ иккинчи тур ўйинидан кейин «Реал» майдонига сафар бўлади.
«Ювентус» «Интер» билан ўйиндаги феноменал ғалабадан (4:3) кейин қаторасига икки бор дуранг ўйнади. «Верона» майдонидаги дурангга аниқ очко йўқотиш деб қаралса, «Аталанта» билан ўйин натижасига аниқ баҳо бериш қийин. Бир томондан, бергамоликлар ҳужумкор жамоа ва Сулемананинг икки ҳимоячидан қочиб кетиб, бурчакни аниқ пойлагани меҳмонларнинг ягона голи бўлиб қолмаслиги ҳам мумкин эди. Шу билан бирга, Кабал ҳисобни тенглаштирганидан кейин «Кекса синиоралар» ғалабани илиб кетишга ҳам яқин келишди. Туринликлар ўйин охирида тўпга ва ҳудудларга эгалик қилишди, 80-дақиқада Де Рон иккинчи сариқ карточкани олганидан кейин сон жиҳатдан ҳам устунликка эга бўлишди. Аммо якуний штурмда Маккенни яқин позицияда туриб гол ура олмади ва ҳисоб ўзгармай қолди.
Лаутаро Мартинес қаторасига уч турдан буён гол уролмаётганди. Аммо аргентиналик ҳужумчи бошланғич таркибга қайтиши биланоқ Бастонининг узатмасидан фойдаланиб, ҳисобни очди. Бу Мартинес учун А Серияда «Интер» учун урилган 117-гол бўлди ва у нерадзуррилар тарихидаги тўпурарлар рўйхатида Сандро Маццолани ортда қолдирган ҳолда бешинчи ўринга кўтарилди. Ундан юқорида фақат Жузеппе Меацца (197), Бенито Лоренци (138), Иштван Ниерш (133) ҳамда Алессандро Алтобелли (128) жойлашган. Ўйин охирида эса Кристин Киву ёшлар жамоасидан жалб этган Пио Эспозито чемпионатдаги илк голини нишонлади. Клуб тарбияланувчиси ҳисобланган, ўтган мавсумни «Специя»да ижара асосида ўтказган ёш ҳужумчини мураббий клублар ўртасидаги жаҳон чемпионатида ҳам синаб кўрганди ва у аста-секин асосий жамоа аъзосига айланиб бормоқда. Тюрам ўрнига туширилган 20 ёшли форвард Димарконинг узатмасини голга айлантирди.
«Боруссия» тезкор гол ўтказиб юбориши мумкин эди, аммо мезбонлар ҳужуми тўп дарвоза устунига тегиши билан якунланди, жавоб ҳужумида эса ҳисоб очилди. Байер ўнг қанотга тўпни узатди, Брандт ҳимоячи Свенсонни голли пас билан таъминлади. Иккинчи голли ҳужумда эса асосий ролни майдоннинг иккинчи қисмидан ажойиб рейд уюштирган Адейеми бажарди. У тўпни ҳимоячи ёнидан чиройли тарзда ўтказиб юборди ва уни айланиб ўтди, шундан сўнг жарима майдони олдида Брандт билан девор услубида ўйнаб, тўпни қайта қабул қилиб олгач, бурчакни аниқ нишонга олди. Дортмундликлар бундеслигада кетма-кет ўнта ўйинда танаффусга ғолиб ҳолда йўл олган биринчи жамоа сифатида тарихга кирди.
«Бавария»ни «Боруссия»дан ташқари «Лейпциг» ҳам таъқиб этмоқда, ушбу жамоа янги мавсумни амалдаги чемпиондан 0:6 ҳисобидаги йирик мағлубият билан бошлаганди, лекин тезда ўзига келиб қаторасига тўрт ўйинда ғалаба қозонди. Навбатдаги турда эса «Волфсбург» майдонига сафар қилган «ҳўкизлар» илк дақиқаларданоқ устунлик қилди ва биринчи голи офсайд туфайли бекор қилинган бўлса-да, кейинги ҳужумдаёқ ҳисобни очди. Бакайоко жарима майдони чизиғи олдида туриб яқин бурчакни аниқ нишонга олди ва мавсумдаги голлари сонини учтага етказди. Бу гол уч очко учун етарли бўлиб чиқди, меҳмонлар ўйин охирида ҳисобдаги фарқни ошириши ҳам мумкин эди, аммо Баумгартнер пеналтидан фойдалана олмади.
«Байер» эса Ҳамбургда ҳам қийналди, фақат биринчи бўлим ўрталарида ҳимоячидан ўзига келиб қолган тўпни дарвозага аниқ йўналтирган Тапсоба ҳисобни очди. Аммо кўп ўтмай дарвозабон Флеккен леверкузенликларни уялтирди, у тўпга чиқишда ишончсиз ҳаракат қилиб, тўпни қўлидан чиқариб юборди, Вал эса қайчи услубидаги зарбаси билан ҳисобни тенглаштирди. Даниялик дарвозабон ўйин охирида айбини ювди ва хавфли жарима зарбасини бартараф этиб, «аспиринчилар» учун ғалабали ҳисобни сақлаб қолди. Бунгача эса меҳмонлар устози Каспер Юлманнинг иккинчи бўлимдаги алмаштиришлари иш берган ва Поку майдонга тушганига икки дақиқа ўтмасдан Грималдонинг узатмасини голга айлантирганди.
Шанба кунги дастурнинг охирги ўйинида қизиқ ҳолат кузатилди. Менҳенгладбаҳликлар 72-дақиқадан кейин тўртта гол уришди, охирги икки гол қўшимча дақиқаларда киритилди, лекин бу мағлубиятдан қутулиш учун ҳам етарли бўлмади. Чунки Гладбаҳдаги ўйиннинг биринчи бўлимидаёқ масала ҳал қилиб бўлган ва «Айнтрахт» танаффусгача бешта жавобсиз гол урган, иккинчи бўлим бошида ҳисобдаги фарқни олтитага етказганди. Ўтган турда «Унион»дан 3:4 ҳисобида мағлуб бўлган меҳмонлар бор аламини кейинги рақибдан олишди - 6:4. Франкфурт жамоаси энди «Байер»дан ўзиб кетиб, камида якшанба кунги ўйинлар якунларигача кучли тўртликка кириб олди.
