Амалга ошмаган саёҳат: Тошкентда турфирма одамларни чув туширди

Чет элга саёҳат қилиш мақсадида “Lastochka Planeta” МЧЖга (“Drujba Travel”) тўлов қилган ўнлаб фуқаролар алданди: фирма мансабдорлари на пулни қайтарган, на саёҳатни ташкиллаштириб берган. Алданганлар орасида саёҳат учун 15 минг доллардан ортиқ пул тўлаганлар ҳам бор. Пулини қайтариб беришни сўраганлар ҳатто таҳдидга учраганини, фирма вакиллари “кўча болаларини олиб келиб босим қилганини” айтмоқда.

{Yii::t(}

Ўтказиб юбориш 6s

Ўтказиб юбориш

Тошкент шаҳридаги “Lastochka Planeta” МЧЖ чет элга саёҳатга жўнатиш ваъдаси билан ўнлаб одамларни алдади. “Drujba Travel” номи остида фаолият юритган турагентдан жабрланган фуқаролар Kun.uz’га мурожаат қилди. Улар саёҳат учун тўлаган пуллари қайтариб берилмаётганини айтмоқда.

Мурожаатчилардан бирига кўра, у Шарм аш-шайхга 22 киши саёҳатга бориши учун “Drujba Travel”га 15 700 доллар тўлаган. Бироқ фирма ходимлари турли баҳоналар билан уларни саёҳатга юбормай, алдаб келган.

“18 июл куни “Drujba Travel” турфирмаси ходими Нигора Азизовага 22 кишига Шарм аш-шайхга тур қилиб бериши учун 15 700 доллар бердик. Шундан кейин туримизни қилиб бергани йўқ. Мана, 2 ой бўлибдики қўнғироқларимизга ҳам жавоб бермайди. 19 август куни Шарм аш-шайхга учишимиз керак эди, учмадик. Телефонимизни кўтармасдан қочиб юрибди. Пулимизни қайтариб бер десак, қайтариб бермаяпти. Биринчи 7 300 долларни берганман, кейин 4 200 доллардан 2 марта тўлов қилганмиз. Нигора Азизовага шахсан ўзим қўлим билан берганман”, дейди фуқаро Саидамир Асқархўжаев.

“Drujba Travel”га алданиб қолган фуқароларнинг айримлари дўстлари, баъзилари оила аъзолари, ота-онаси ва фарзандлари билан саёҳатга бормоқчи бўлган. Аммо бу орзу-ҳавас ва хурсандчилик узоққа чўзилмаган.

“Drujba Travel”нинг ижтимоий тармоқлардаги саҳифалари фаол равишда юритилган. Ҳатто фирма ўз хизматларини таниқли блогер ва санъат соҳаси вакилларига ҳам реклама қилдирган. “Биз ана шу рекламаларга ишониб боргандик”, демоқда мурожаатчилар.

“Август ойининг бошида 8 киши Шарм аш-шайхга оилавий бормоқчи бўлдик. Ижтимоий тармоқларда “Drujba Travel”нинг рекламасини кўриб, 12 августда Яккасаройдаги филиалига бордик. У ерда оператор Севинч Носирова бизга тур пакет таклиф қилди. Ўша тур пакет бўйича биз 8200 долларга шартнома имзоладик. Аванс сифатида 5 000 доллар бердик. Кейин 3 сентябр куни қолган суммани бериш учун Шайхонтоҳурдаги филиалига бориб, директор Нигора Азизовага 3 200 доллар бердик. 7 сентябр куни учишимиз керак эди, лекин 6 сентябр куни ҳам бизга билет билан воучер тақдим қилишмади. 6 сентябр куни филиалга борганимизда оператор қиз Севинчнинг ўзи ўтирганди. Соат тунги 1:00 гача кутдик, на директор алоқага чиқди, на оператор бизга ваучер тақдим қилди”, дейди фуқаро Аброр Мирзахўжаев.

Тўлов қилиб, дам олишга кетолмаётган фуқаролар пулларини қайтариб олиш мақсадида “Dujba Travel” офисига боришганида бир нечта эркак уларга таҳдид қилганини ҳам айтмоқда.

“Икки ойдан бери сарсонмиз, қаерга боришни билмаяпмиз. Болаларимиз кутиб-кутиб умидларини узишди. Таътил ҳам ўтиб, мактаблар бошланиб кетди. Пулларимизни сўраб, қайта-қайта офисига бордик. У ерда бизни чиқариб юбориш учун кўча болаларини жўнатишни бошлашди. Қўрқдик, чунки у ерда аёллар эдик. Ўша ерда Севинч деган менежер ўтирганди. Нигора опа келсин, пулимизни қайтарсин ёки туримизни қилиб берсин, шунча одам кутяпти, десак кўчадан учта бола келиб “Сизларни саёҳатга кетадиган кунингиз ҳали келмади, нимага келдингиз?” дейишди. Биз сизларни чиқариб юбориш учун келдик, деб таҳдид қилишди. Шундан кейин биз 102 га қўнғироқ қилдик, аммо улар бизга ҳеч қандай жавоб бермади. “Участкавой”ни чақирдик, у ҳам чиқмади. Улар томонидан 102 га қилинганидан кейин 6-7 нафар ППХ ходими келди. Улар ҳам бизга қарши бўлди. Шундан бери қўрқиб, ўзимизга кела олмаяпмиз”, дейди Муниса Асқархўжаева.

“Drujba Travel”га алданганлар мазкур ҳолатлар бўйича тегишли ташкилотларга мурожаат қилишганини, аммо натижаси бўлмаганини айтишди. Уларга кўра, ушбу фирмага алданиб қолганлар сони 30 нафардан ортиқ.

Kun.uz журналисти ҳолатга ойдинлик киритиш мақсадида “Drujba Travel” офисларига борди. Бироқ фирма офислари ёпиқлиги, иш фаолияти тўхтатилгани, телефон рақамлари ишламаётгани маълум бўлди.

Очиқ маълумотларга кўра, “Lastochka Planeta” МЧЖ 2023 йил январида давлат рўйхатидан ўтказилган. Туристик агентликлар фаолияти билан шуғулланувчи МЧЖнинг раҳбари ва таъсисчиси Азизова Нигора Абзаловна.

Жабрланувчиларнинг таъкидлашича, ҳозирда фирма мансабдорларига нисбатан жиноят иши қўзғатилган ва тергов ҳарактлари олиб борилмоқда.