G7 Украинада тинчлик ўрнатиш учун Россияга босимни кучайтиришга келишиб олди

G7 мамлакатлари Украинани қўллаб-қувватлаш учун ўз юрисдикцияларидаги Россия активларининг «тўлиқ қийматидан фойдаланиш» имкониятини кўриб чиқмоқда, дейилади аъзо давлатлар молия вазирларининг виртуал учрашуви якунлари бўйича баёнотида.

Фото: Reuters

"Катта еттилик" давлатлари Киевга молиявий эҳтиёжларини қондириш учун «кенг кўламли чора-тадбирлар» ишлаб чиқмоқда. Бундай чоралардан бири Украинадаги урушни тугатиш ва адолатли ва мустаҳкам тинчликни кафолатлаш учун G7 юрисдикцияларида музлатилган Россия активларининг «тўлиқ қийматидан фойдаланиш»дир. Бу ҳақда G7 молия вазирларининг 1 октябр, чоршанба куни видеоконференция шаклида ўтказилган учрашуви якунлари бўйича эълон қилинган қўшма баёнотида айтилди. Тегишли чора-тадбирлар қонунчилик доирасида кўрилиши таъкидланмоқда.

Шу билан бирга, иштирокчилар Москва учун муҳим даромад манбаи бўлган нефт экспорти бўйича Россияга босимни «максимал даражада кучайтириш»га келишиб олди. «Биз Украинага бостириб киришдан кейин Россия нефтини сотиб олишни кўпайтиришда давом этаётганларни ва санкцияларни четлаб ўтишга ёрдам берганларни нишонга оламиз», деб ваъда берди G7 молия вазирлари.

Бундан ташқари, улар «Россиядан қолган импорт ҳажмини, жумладан, углеводородлар импортини босқичма-босқич йўқ қилиш мақсадида аниқ чора-тадбирлар кўришга» қарор қилди. «Шунингдек, биз Россиянинг ҳарбий ҳаракатларини молиялаштиришга ёрдам берадиган давлатлар ва ташкилотларга, жумладан, Россия нефтидан ишлаб чиқарилган нефт маҳсулотларига қарши чора-тадбирларга нисбатан савдо чоралари ва бошқа чекловлар қўллаш имкониятини жиддий кўриб чиқяпмиз», — дейилади ҳужжатда.