Айрим дорихоналарда сертификатланмаган дорилар аниқланди

Рақобат қўмитасига республиканинг айрим дорихоналарида чет элда ишлаб чиқарилган дори воситаларининг сифати кафолатланмаган нусхалари сотилаётганлиги ҳақида хабарлар келиб тушди.

Фото: Kun.uz

Қўмита ўз ваколатлари доирасида Фармацевтика маҳсулотлари хавфсизлиги маркази билан ҳамкорлик назорат хариди тадбири ўтказди. Ушбу олиб борилган тадбирлар натижасида, айрим дорихоналардан харид қилинган препаратларнинг сериялари Давлат реестрига киритилмагани ёки мувофиқлик сертификати мавжуд эмаслиги ҳолатлари аниқланди.

Жумладан, Наманган вилоятидаги дорихонада Forsiga, Андижон вилоятидаги айрим дорихоналарда "Брилинта", Forsiga, Pulmicort, Тошкент шаҳридаги айрим дорихоналарда Forsiga ва "Брилинта" дорилари шулар жумласидан.

Юқорида аниқланган ҳолатлар бўйича тўпланган барча ҳужжатлар белгиланган тартибда дорихоналар кесимида тегишли чоралар кўриш ва сифати кафолатланмаган дори воситалари савдодан йиғиб олиниш мақсадида Фармацевтика маҳсулотлари хавфсизлиги маркази ҳамда Иқтисодий жиноятларга қарши кураш департаментига юборилган.

Рақобат қўмитаси истеъмолчиларни дори воситаларини харид қилишда уларнинг сертификатини текшириб кўриб, кейин харид қилишлари мақсадга мувофиқлиги ҳақида огоҳлантирди.

Шу билан бирга, сертификатлар ҳақидаги маълумотларни онлайн тарзда текшириш имконияти ҳам мавжуд. Истеъмолчилар Фармацевтика маҳсулотлари хавфсизлиги марказининг махсус электрон тизими орқали дори воситалари, тиббий буюмлар ва тиббиёт техникалари учун берилган мувофиқлик сертификатлари ҳақида маълумот олиши мумкин.

Тайёрлаган: Отабек Матназаров

#сертификат #дорихона