Сўров: америкаликларнинг аксарияти РФга қарши янги санкцияларни қўллаб-қувватлади

Сўров шуни кўрсатдики, кўпчилик америкаликлар Путиннинг ниятлари самимий эканига ишонмайди ҳамда санкцияларни кучайтириш ва Украинага қурол сотишни қўллаб-қувватлайди.

Фото: Spencer Platt / Getty Images

Америкаликларнинг катта қисми (77 фоиз) Украинадаги урушни тугатиш учун Россияга нисбатан АҚШ санкцияларини кучайтиришни қўллаб-қувватламоқда. Бу - Ҳарвард Америка сиёсий тадқиқотлар маркази (Harvard Center for American Political Studies, CAPS) ва The Harris Poll / HarrisX томонидан ўтказилган сўров натижалари. 2025 йилнинг 1 ва 2 октябр кунлари АҚШда рўйхатга олинган 2413 нафар сайловчи ўртасида онлайн сўров ўтказилди.

Демократлар (73 фоиз) ва республикачиларнинг кўпчилиги (67 фоиз) Украинага санкциялар ва қурол-яроғ етказиб беришни кучайтиришни қўллаб-қувватлаган. Бундан ташқари, респондентларнинг аксарияти (69 фоиз) агар бу урушни тугатишга ёрдам берса, АҚШнинг Украина учун потенциал хавфсизлик кафолатларини қўллаб-қувватлаган.

Респондентларнинг 66 фоизи АҚШ президенти Доналд Трампнинг урушни тугатиш борасидаги саъй-ҳаракатларини қўллаб-қувватлашини билдирган бўлса, атиги 40 фоизи Россия президенти Владимир Путин билан Аляскадаги учрашув бу борада фойдали бўлганига ишонган. Респондентларнинг ярмидан сал кўпи (52 фоиз) Трампнинг Украинадаги урушни тугатиш бўйича олиб бораётган ишларидан қониқиш ҳосил қилган.

Сайловчиларнинг учдан икки қисми (67 фоиз) Путин «Ғарб билан ўйин ўйнаяпти» ва урушни тўхтатишни чин дилдан истамайди, деб ҳисоблайди. Июл ойида респондентларнинг 73 фоизи шундай деган. Украина президенти Володимир Зеленский юзасидан худди шундай савол берилганда, худди шу 67 фоиз иштирокчилар унинг урушни тугатиш ниятида самимий эканлигига ишонишини айтган.

58 фоизи Трамп Путинга нисбатан қаттиққўл эмаслигини айтди. Сайловчиларнинг 29 фоизи Америка президенти Зеленскийга нисбатан жуда қаттиққўл эканини, 33 фоизи у етарлича қаттиққўл эмаслигини, 38 фоизи Трампнинг Зеленскийга нисбатан позициясини тўғри деб ҳисоблаган.

Сайловчилардан, шунингдек, Россия ёки Украина билан муносабатларни муҳимроқ деб билиши ҳақида сўралган. Бироқ, савол аниқлаштириб берилган: улардан «АҚШга триллионлаб долларлик фойдали қазилмаларнинг ярмини экспорт қилган ва ўзининг ҳарбий зукколиги туфайли Россиянинг Европадаги агрессиясини тўхтатаётган Украина билан муносабатлар» ҳамда «ядровий давлат ва Хитойга қарши туриши мумкин бўлган Россия билан муносабатлар» ўртасида танлов қилиш сўралган.

69 фоизи Украина билан муносабатларни маъқуллаган бўлса, 31 фоизи Россия билан муносабатларни маъқуллаган.