Лондон «Роснефть»нинг икки шуъба корхонасини санкциялардан чиқарди

Буюк Британиянинг Молиявий санкцияларни ижро этиш бошқармаси сайтида чоршанба, 22 октябр куни эълон қилинган ҳужжатга кўра, лицензия 2027 йил 22 октябргача амал қилади ва шу давр ичида «Роснефть»нинг мазкур шуъба корхоналари фаолияти учун сезиларли чекловларга эга алоҳида тартиб белгиланади.

Die Märkische Allgemeine Zeitung (MAZ) газетаси таъкидлашича, умумий санкциялар рўйхатидан ушбу истисно туфайли Буюк Британияда рўйхатдан ўтган Shell каби компаниялар кейинги икки йил давомида Германиядаги «Роснефть» шуъба корхоналари билан ишини давом эттириши мумкин бўлади. Хусусан, «барқарор даражани таъминлаш» учун Rosneft Deutschland 2026 йилнинг охиригача Қозоғистондан кўпроқ нефт қабул қилади.

Россиянинг Украинага қарши тўрт йилдан бери давом этаётган уруши шароитида Буюк Британия 15 октябр куни «Лукойл» ва «Роснефть»га нисбатан санкциялар киритди. Ўша куни жами 90 та янги жазо чоралари эълон қилинди.

Ҳужжатга биноан, санкциялар активларни музлатишни, траст хизматларини кўрсатиш ва транспорт операцияларига чеклов қўйишни назарда тутади. Лондонда тушунтирилишича, бу компаниялар Россия ҳукумати учун «ҳал қилувчи аҳамиятга эга» соҳада — хусусан энергетикада — фаолият юритади. Илгари «Лукойл» ва «Роснефть» соҳа чекловлари остида бўлган.

«Роснефть» учун алоҳида чекловлар ўрнатилди: унга тегишли ёки у бошқарадиган кемалар эндиликда Британия портларига кира олмайди. Шунингдек, «Роснефть» билан боғлиқ ҳаво кемаларига Буюк Британия ҳаво ҳудудидан ўтиш ёки унинг ҳудудига қўниш тақиқланади. Россия нефт компаниялари билан бир қаторда санкциялар уларнинг хорижий ҳамкорларига ҳам тегишли бўлди.

Европа Иттифоқи мамлакатларининг доимий вакиллари Россиянинг Украинага қарши тажовузкор уруши учун 19-санкциялар пакетини маъқуллади. Бундай қарор 22 октябр кечқурун, Брюсселда бўлиб ўтадиган Европа Кенгаши йиғилиши олдидан қабул қилинди.

Москвага нисбатан янги чекловлар якдиллик билан қўллаб-қувватланди. Санкцияларга қарши эътирозларни энг охиргилардан бўлиб Словакия олиб ташлади. Илгари Австрия ҳам пакетни тўсмасликка ваъда берган эди. Еврокомиссия томонидан сентябр ўрталарида тақдим этилган 19-пакетга кўра, 2027 йил 1 январдан РФдан суюлтирилган табиий газ (LNG) импорт қилишга тўлиқ тақиқ жорий этилади ва «соядаги флот» кемалари рўйхати кенгайтирилади. Шунингдек, чекловлар Ғарб санкцияларини четлаб ўтиб РФ энергоресурслари савдосида, жумладан криптовалюта орқали кўмаклашаётган учинчи мамлакат компанияларига ҳам татбиқ этилади. Янги чекловлар «Роснефть» ва «Газпром нефть» билан ҳар қандай битимларни тақиқлайди ва Россия нефти учун нарх чегарасини пасайтиради.