Полшада жосусликда гумонланиб икки украиналик қўлга олинди

Полшанинг Ҳарбий контрразведка хизмати (SKW) ва Ички хавфсизлик агентлиги (ABW) хорижий разведка фойдасига жосуслик қилганликда гумонланган икки нафар Украина фуқаросини қўлга олди. Бу ҳақда душанба, 27 октябр куни махсус хизматлар бўйича вазир-координатор матбуот котиби Яцек Добжинский маълум қилди.

Фото: EPA

«Ёши 32 ва 34 да бўлган эркак ва аёлга разведкавий вазифалар юклатилган, жумладан Полша ҳарбий салоҳиятини аниқлаш ҳамда танқидий аҳамиятга эга инфратузилмаларни яширин кузатиш учун қурилмалар ўрнатиш», — деб ёзди Добжинский X ижтимоий тармоғида.

Унга кўра, тўпланган маълумотлар Полша ҳарбий хизматчилари ва мамлакат ҳудудидаги танқидий инфратузилма объектларига, шу жумладан Украинага логистика ва ҳарбий ёрдам кўрсатишда иштирок этувчи транспорт ечимларига тааллуқли бўлган. Шу билан бирга, украиналиклар қайси махсус хизматлар манфаатида ишлагани очиқланмаган.

ABW пресс-релизида қайд этилишича, қўлга олиш 2025 йил 14 октябр куни Полша жанубидаги Катовице шаҳрида амалга оширилган. Эртаси куни ҳар икки гумонланувчи прокуратурага олиб борилиб, уларга айблов эълон қилинган. Суд прокурорнинг илтимосномасини қаноатлантириб, уларни уч ой муддатга қамоққа олишга ҳукм чиқарган.

Бир ҳафта олдин Полша Бош вазири Доналд Туск мамлакат ҳудудида диверсиялар тайёрлаётганликда гумон қилинаётган саккиз киши қўлга олинганини хабар қилган эди. Улардан бири — Украина фуқароси Данило Х., у Полша ва Руминия ҳудудида РФ махсус хизматлари учун ишлагани айтилганини ABW аниқлаштирган. Унга ёрдам беришда айбланаётган яна икки украин фуқаросини румин ҳуқуқ-тартибот органлари қўлга олган.

Добжинскийнинг сўзларига кўра, «сўнгги ойлар ичида ABW ходимлари жами 55 кишини Россия разведкаси топшириғига биноан Полшага зарар етказиш фаолиятида айблаб қўлга олган».