Samsung уч қисмга очиладиган экранли телефонни намойиш қилди

Телефон Жанубий Кореянинг Кёнджу шаҳрида APEC саммити доирасида ўтган кўргазмада намойиш этилди. Қурилма шиша ортида, ёпиқ ва ёйилган ҳолатда қўйилди. Шу билан бирга унга тегиш мумкин эмас эди.

Bloomberg аввал хабар қилганидек, бу Samsung’нинг икки шарнирли биринчи телефони бўлиб, у ҳам оддий смартфон, ҳам планшет сифатида ишлай олади. Қурилманинг техник хусусиятлари номаълум.

The Verge таъкидлашича, ушбу моделнинг номи йўқ. Шу билан бирга Жанубий Кореянинг Dailian нашри қурилма Galaxy Z Trifold деб аталишини ёзди.

pic.twitter.com/MLRXg3a74U

— BIswatma (@thebiswatma) October 28, 2025

Samsung SamMobile нашрига маълум қилишича, ўтказилган тақдимот «тадқиқот ва ишланмалар соҳасидаги жорий саъй-ҳаракатларни акс эттиради» ва компания 2025 йил охирига қадар «келгуси авлод қурилмаси»ни намойиш этишни режалаштирмоқда.

Илгари Samsung уч қисмга ёйиладиган экранли телефон концептларини кўрсатган эди, аммо бу сафар компания яқин орада сотиб олиш мумкин бўладиган биринчи қурилмани тақдим этган бўлиши мумкин, деб ёзади The Verge.

Samsung компанияси экран икки қисмга ёйиб очиладиган биринчи телефонини 2019 йилда тақдим этган. 2025 йил июлида эса жанубий кореялик ишлаб чиқарувчи китоб шаклидаги еттинчи авлод букланувчи смартфони — Galaxy Z Fold 7’ни чиқарди.

Дунёда экран уч қисмга ёйиб очиладиган биринчи телефонни 2024 йилда Хитойнинг Huawei компанияси тақдим этган. 2025 йил сентябрида ишлаб чиқарувчи қурилманинг иккинчи авлодини чиқаришини эълон қилди.

Bloomberg аввал ёзганидек, Apple ҳам ўзининг биринчи букланувчи iPhone’ини 2026 йилда чиқаришни режалаштирмоқда.