Сербия миллий авиакомпанияси Самарқанд ёки Тошкентга парвозларни йўлга қўйиши мумкин

Сербия президенти Александр Вучич Тошкентда берган баёнотида миллий авиакомпаниянинг Самарқанд ёки Тошкент йўналиши бўйича парвозларни йўлга қўйиши режалаштирилаётганини, якуний қарор таҳлил натижаларига кўра қабул қилинишини маълум қилди.

Фото: Президент матбуот хизмати

Tanjug агентлиги хабар беришича, Вучич 28 октябр куни Ўзбекистонга ташрифи доирасида икки мамлакат барча даражаларда ўзаро сиёсий қўллаб-қувватлашга келишиб олганини айтди. Шунингдек, келгусида эркин савдо тўғрисидаги битим ва инвестицияларни ҳимоя қилиш бўйича келишув имзоланишига умид билдирди.

Президентга кўра, Сербиянинг миллий ташувчиси (Air Serbia) Гуржистон ва Бокуга рейсларни йўлга қўйганидан сўнг Марказий Осиёга очилишни кўриб чиқмоқда. Унга биноан, Самарқанд ёки Тошкент орасида тижорий-иқтисодий таҳлил натижаларига қараб танлов қилинади ва рейслар йўлга қўйилиши мумкин.

Вучич, шунингдек, икки давлат ўртасидаги иқтисодий ҳамкорликни кенгайтириш учун бир қатор муҳим ҳужжатлар имзоланганини қайд этди. Ушбу келишувлар келажакдаги преференциал савдо шартномаси учун асос бўлиб хизмат қилиши кутилмоқда.