Тўққиз давлат фирибгарларга қарши кенг кўламли амалиёт ўтказди

Халқаро амалиёт чоғида ҳуқуқни муҳофаза қилувчи органлар Европа, Осиё ва Шимолий Америкадаги қатор мамлакатларда молиявий фирибгарлик ва пул ювиш билан шуғулланган, деб гумон қилинаётган шахслар манзилларида тентувлар ўтказди. Бу ҳақда 4 ноябр куни Германиянинг Федерал жиноят ишлари бўйича идораси (BKA) хабар берди.

Тергов маълумотларига кўра, гумонланувчилар 193 давлатдан жабрланувчиларнинг банк карталари маълумотларидан фойдаланган. Жиноятчилар сохта сайтлар орқали онлайн хизматларга 19 миллиондан ортиқ обуна расмийлаштиргани ҳам қўшимча қилинди.

Шунингдек, фирибгарлар Германиядаги тўртта йирик тўлов сервисига ноқонуний кириб, улар орқали тўловларни амалга оширган, деган гумон бор.

Тинтувлар Германия, Италия, Канада, Люксембург, Нидерландия, Сингапур, Испания, АҚШ ва Кипрдаги кўплаб объектларда ўтказилди. BKA маълумотича, бир неча киши қўлга олинган.

Жиноят полицияси идораси амалдаги зарар бир неча юз миллион еврони ташкил қилишини қайд этди.