Бойларни ром этган мегаполислар. Миллиардерлар асосан қайси шаҳарларда яшайди?

Йилдан йилга дунёдаги мега бойларнинг сони шиддат билан ошиб боряпти. Сунъий интеллект, биотехнология, криптовалюталар ва бошқа юқори технологик соҳалар янги бойлик манбаларини яратяпти. Forbes’нинг 2025 йилги дунё миллиардерлари рўйхатига 3028 нафар тадбиркор, сармоядор ва меросхўр киритилган. Бу рекорд кўрсаткич ҳисобланади. Миллиардерлар сони 2024 йилга нисбатан 247 нафарга кўпайган ва уларнинг умумий бойлиги 16,1 триллион долларга етган. 

Миллиардерлар асосан қайси шаҳарда яшайди?

Энг кўп миллиардерлар яшайдиган шаҳарлар рўйхатида биринчи ўринни Ню Йорк эгаллади. АҚШнинг энг йирик шаҳрида 123 нафар миллиардер истиқомат қилади, уларнинг умумий бойлиги 759 миллиард долларга баҳоланган.

Ню Йорк 2014 йилдан кейин кетма-кет 7 йил давомида миллиардерларнинг асосий маркази бўлиб келди. 2021 йилда Пекин пешқадамликни қўлга киритганди. Аммо Хитой етакчилиги узоққа чўзилмади. 2022 йилда Ню Йорк пешқадамликни қайтариб олади ва уни ушлаб турибди.

Москва иккинчи ўринни эгаллаган. Россия пойтахтида 90 нафар миллиардер яшайди. Бу ўтган йилга нисбатан 16 нафарга кўп. Уларнинг умумий бойлиги 409 миллиард долларга баҳоланган. Учинчи поғонада Ҳонгконг жойлашган. Ушбу шаҳарда истиқомат қиладиган мега бойларнинг сони 72 нафарни ташкил этади.

Шунингдек, Лондон, Пекин, Мумбай, Сингапур, Сан-Франциско, Шанхай, Лос-Анжелес каби мегаполислар ҳам миллиардерлар учун асосий яшаш масканлари ҳисобланади. Умуман олганда, мега бойлар дунёнинг 800 га яқин шаҳрида истиқомат қилади. Юқорида номлари тилга олинган 10 та шаҳарни уларнинг чорак қисми ўз уйига айлантирган.

Дубай – энг жозибадор шаҳар

Savills халқаро кўчмас мулк компанияси томонидан тузилган мегаполислар орасида бадавлат шахслар учун энг жозибадор шаҳарлар рўйхатида Дубай биринчи ўринни эгаллаган. Ню Йорк эса ривожланган бизнес муҳити ва геосиёсий барқарорлик омиллари ҳисобига иккинчи ўринга жойлаштирилган.

Дубайнинг асосий афзалликлари қаторида мерос солиғининг йўқлиги, ривожланган инфратузилма, юқори даражадаги хавфсизлик ва инвестиция эвазига ўн йиллик "олтин виза" олиш имконияти кабилар бор.

Солиқ ва чекловлар фонида йиллар давомида асосий манзиллардан бири бўлиб келган Британияни бойлар оммавий равишда тарк эта бошлаган. New World Wealth таҳлилий компанияси маълумотларига кўра, ўтган йили қиролликни тарк этганлар орасида 12 нафар миллиардер ва бойлиги 100 миллион доллардан ошган 78 киши бор. Уларнинг кўпчилиги Швейцария, Италия ва Бирлашган Араб Амирликларига чиқиб кетишган.

Аҳоли сонига нисбатан миллионерлар кўп давлатлар

World Population Review маълумотларига кўра, Швейцарияда катта ёшли аҳолининг 16,5 фоизи камида бир миллион долларлик соф активларга эга бўлиб, миллионерларнинг аҳоли сонидаги улуши бўйича дунёда биринчи ўринда турибди. Бу кўрсаткич мамлакатнинг глобал молиявий марказ сифатидаги мавқейини мустаҳкамлайди.

Кейинги ўринлардан Люксембург ва Ҳонконг жой олган. Ушбу давлатларда ҳам аҳоли жон бошига бойлик даражаси жуда юқори бўлиб, шахсий капиталнинг катта қисми юқори қийматли активлар ва ривожланган молия бозорларида тўпланган.

Умумий ҳисобда эса АҚШ миллионерлар сони бўйича мутлақ етакчи. Мамлакатда 25 миллиондан ортиқ миллионер бор. Бу борада иккинчи ўрин 6,5 миллион миллионер фуқароси бор Хитойга тегишли. Франция, Япония ва Германия ҳам 3,2–3,6 миллион атрофида миллионерлар яшашади.

 Яшаш учун энг қулай шаҳарлар

Британиянинг The Economist журнали таҳлилий бўлими – Economist Intelligence Unit (EIU) дунёнинг яшаш учун энг қулай шаҳарлари рейтингини эълон қилиб боради. 

Копенгаген 2025 йил яшаш учун энг қулай шаҳар деб топилган. Австрия пойтахти барқарорлиги, яхши инфратузилмаси, сифатли таълим ва соғлиқни сақлаш хизмати, шунингдек, кўплаб маданий ва кўнгилочар тадбирлар туфайли етакчиликни қўлга киритган.

Иккинчи ўринда Вена ва Цюрих, учинчи ўринда эса Мелбурн қайд этилган. Энг яхши ўнликка, шунингдек, Женева, Сидней, Осака, Окленд, Аделаида ва Ванкувер кирди.