АҚШ «Лукойл»га санкциялар бўйича муҳлатни уч ҳафтага узайтирди

АҚШ президенти Доналд Трамп маъмурияти хорижий активларини сотишга ҳаракат қилаётган Россия «Лукойл» концерни учун санкцияларга оид муҳлатни яна уч ҳафтага узайтирди. Бу ҳақда 14 ноябр куни эълон қилинган АҚШ Молия вазирлиги пресс-релизида маълум қилинди.

Мос равишдаги битимларга тўсқинлик қилиши мумкин бўлган чекловлар 13 декабргача кучга кирмайди. Шу санагача «Лукойл»га Россия ташқарисида жойлашган чакана ёнилғи қуйиш шохобчалари (ЁҚШ)ни хизмат кўрсатиш, эксплуатация қилиш ёки тугатиш билан боғлиқ транзакцияларни амалга оширишга рухсат берилади.

Бундан ташқари, ҳужжатга кўра, «Лукойл» ва «Роснефть» ҳамда уларнинг шуъба компаниялари иштирокидаги операцияларга ҳам рухсат этилган, улар Каспий қувур консорциуми (КТК), «Тенгизшевройл» компанияси ва Қарачаганоқ конларини ўзлаштириш лойиҳаси билан боғлиқ бўлиши лозим. Лицензия КТК, «Тенгизшевройл» ва Қарачаганоқ лойиҳасининг операцион фаолиятига тегишли «барча транзакцияларга» рухсат беради, бироқ КТК, «Тенгизшевройл» ва Қарачаганоқдаги улушларни сотиш ёки ўтказиш билан боғлиқ «ҳеч қандай транзакция» ўтказиш имконини бермайди, дея таъкидланади ҳужжатда.

АҚШ Молия вазирлиги алоҳида лицензия орқали «Лукойл»нинг Болгариядаги фаолиятини давом эттиришга ҳам рухсат берди. Гап, жумладан, Россия компаниясига тегишли бўлган ва Болгария ёнилғи бозорининг тахминан 80 фоизини таъминлайдиган Бургасдаги «Нефтохим» НҚЗ ҳамда самолётлар ва кемаларга ёнилғи қуйиш билан шуғулланувчи компаниялар ҳақида кетмоқда. Уларнинг фаолияти 2026 йил 29 апрелигача санкциялардан озод этилади.

Худди шу куни, 14 ноябрда, Буюк Британия Молиявий санкцияларни амалга ошириш бўйича бошқармаси «Лукойл» Россия нефт компаниясининг Болгариядаги бўлинмалари — Lukoil Bulgaria EOOD ва Lukoil Neftochim Burgas AD билан, санкцияларга қарамасдан, операциялар ўтказишга имкон берадиган лицензия муддатини 2026 йил 14 февралигача узайтирди.

Россия нефт қазиб чиқарувчи компаниялари «Лукойл» ва «Роснефть», шунингдек, уларнинг 34 та шуъба компанияси шу йил октябр ойида Украинага қарши Россиянинг давом этаётган уруши фонида Вашингтон ва Лондон санкциялари остига тушди.

Шундан сўнг «Лукойл» ўзининг хорижий активларини сотишга қарор қилди. Уларни сотиб олишга биринчи даъвогар сифатида Швейцария компанияси Gunvor чиққан, унинг асосчиларидан бири — Россия президенти Владимир Путинга яқин шахс Геннадий Тимченко. АҚШ бу битимни тўсиб қўйди ва Украинадаги уруш тугамагунча компанияга бизнес билан шуғулланиш учун лицензия беришдан бош тортди, бунга Gunvor’нинг Москва билан боғлиқлиги сабаб сифатида кўрсатилди. Шундан сўнг «Лукойл» активларни сотиш учун кўпроқ вақт сўраб, Вашингтонга мурожаат қилгани ҳақида Reuters хабар берган эди.

Эҳтимолий харидорлардан бири сифатида агентлик Carlyle Америка инвестиция компанияси тилга олди, у ҳозирча битимни ўрганишнинг «бошланғич босқичи»да экани айтилган.

Bloomberg агентлиги маълумотларига кўра, «Лукойл» халқаро бозорда энг кенг фаолиятга эга Россия компаниясидир. У Европа ҳудудида нефтни қайта ишлаш заводларида улушларга, шунингдек, Ироқдан то Қозоғистонгача бўлган нефт конларида катта улушларга эга. Муаллифлар эслатишича, унинг бренди АҚШдан бошлаб Белгия ва Руминиягача бўлган ҳудуддаги АЁҚШ тармоқларида ҳам акс этган.