Еврокомиссия: Украинани молиялаштириш бўйича қарорни кечиктириб бўлмайди

Европа комиссияси Украинага молиялаштириш вариантлари таклиф этилган ўз хатига Евроиттифоқ аъзо давлатларидан иложи борича тезроқ жавоб кутмоқда, чунки «вақт тиғиз», деб таъкидлади Еврокомиссиянинг расмий вакили Паула Пиню 18 ноябр куни Брюсселда бўлиб ўтган брифингда.

DW'нинг Еврокомиссия раиси Урсула фон дер Ляйеннинг хатига ЕИ мамлакатлари қандай реакция билдиргани ҳақидаги саволига жавобан, Еврокомиссиянинг яна бир расмий вакили Балаш Уйвари ҳозирча бунга баҳо беришга эрта эканини айтди, чунки хат 17 ноябр куни юборилган.

Еврокомиссияга кўра, Украина молиялаштирилиши масаласи бўйича муҳокама ва фон дер Ляйен ҳамда бошқа иштирокчилар ўртасидаги мулоқот давом этади. Ҳозиргача у бу мавзуда ҳеч қандай расмий қонун лойиҳасини тақдим этмаган, фақат вариантлар баён этилган хат билан чекланган.

Таклиф этилаётган уч вариант орасида: биринчиси — ЕИ мамлакатлари томонидан Европа Иттифоқига ихтиёрий икки томонлама грантлар ажратиш, кейин ЕИ бу маблағларни «зарур шартларга риоя этилган ҳолда» Украинага ўтказади. Иккинчиси — Евроиттифоқнинг молия бозорларидан қарз олиш ҳисобига Украинага кредит ажратиши, кейинчалик Украина бу кредитни Россиядан уруш оқибатида етказилган зарар учун олинадиган компенсациялар ҳисобига қоплайди. Бу вариантда маблағлар музлатиб қўйилган Россия активлари ҳисобидан эмас. Учинчи вариант сифатида эса Еврокомиссия аввалдан маълум бўлган — музлатилган Россия активлари ҳисобидан Киевга «репарацион кредит» бериш таклифини яна такрорлади. Бу таклифни ҳозирча Белгия блоклаб турибди.

Сиёсатчилар, мансабдорлар ва экспертларнинг таъкидлашича, Украинани 2026–2027 йилларда молиялаштириш бўйича якуний қарор 18–19 декабр кунлари бўлиб ўтадиган ЕИ етакчилари саммитида қабул қилиниши керак. Акс ҳолда, Киев 2026 йилнинг иккинчи чорагидаёқ бюджет маблағларисиз қолиб кетиши мумкин.

Украинани молиялаштириш мавзуси 20 ноябр куни Брюсселда ўтадиган ЕИ ташқи ишлар Кенгаши мажлисида ҳам қисман муҳокама қилинади, аммо кун тартибига алоҳида банд сифатида киритилмаган, деб маълум қилди 18 ноябр куни бўлиб ўтган бошқа бир брифингда Евроиттифоқнинг юқори мартабали мансабдори.

Шунингдек, Россияга нисбатан келажакда қабул қилиниши мумкин бўлган 20-санкциялар пакети мазмунига оид ғоялар алмашинуви ҳам режалаштирилган. Бироқ бу учрашувда аниқ қарорлар қабул қилиниши кутилмаяпти. Асосий мавзу — Россия нефтини нарх чекловини четлаб ташийдиган «соя флоти»га қарши чоралар бўлади.