Бухорода 35 минг долларга симоб сотган шахслар ушланди

Давлат хавфсизлик хизматининг Бухоро вилояти бўйича бошқармаси ходимлари томонидан Иқтисодий жиноятларга қарши курашиш департаменти ҳамда Миллий гвардиянинг ҳудудий бошқармалари билан ҳамкорликда тезкор тадбир ўтказилган.

Тадбир давомида Бухоро шаҳрида яшовчи 1998 йилда туғилган шахс ва Бухоро туманида истиқомат қилувчи 1984 йилда туғилган фуқаро олдиндан ўзаро тил бириктириб, мамлакатда эркин сотилиши тақиқланган симоб моддасини ноқонуний айланмага чиқаришга урингани аниқланган.

Маълумотларга кўра, улар 3 дона флаконда бўлган жами 343 грамм симоб моддасини 35 минг АҚШ долларига сотиш чоғида ДХХ ходимлари томонидан ашёвий далиллар билан ушланган.

Ҳозирда ушбу шахсларга нисбатан Ўзбекистон Жиноят кодексининг 185-1-моддаси 2-қисми “б” ва “в” бандлари билан жиноят иши қўзғатилиб, тергов ҳаракатлари олиб борилмоқда.

Расмий органлар фуқароларга мурожаат қилиб, симоб ва уни ўз ичига олган бирикмаларни эркин сотиш, сотиб олиш, сақлаш ёки маиший шароитда фойдаланиш қатъий тақиқланганини эслатди. Симоб кучли заҳарли модда ҳисобланиб, унинг мамлакат ҳудудида эркин айланишига йўл қўйилмайди.