Чилонзорда ЙТҲдан сўнг электромобил ёниб кетди

Тошкент шаҳар Чилонзор туманида содир бўлган йўл-транспорт ҳодисаси натижасида электромобил ёниб кетди. Ёнғин-қутқарув хизматлари ҳодиса жойига қисқа фурсатда етиб бориб, ёнғинни бир неча дақиқа ичида бартараф этди. Жабрланганлар йўқ.

Фото: ФВВ

Маълумотларга кўра, 19 ноябр куни соат 22:58 да Тошкент шаҳар Чилонзор тумани “Дилобод” маҳалла фуқаролар йиғинининг 6-даҳасида электромобил йўл-транспорт ҳодисаси натижасида ёнaётгани тўғрисида Тошкент шаҳар Фавқулодда вазиятлар бошқармасига хабар келиб тушган.

Келиб тушган мурожаат асосида ёнғин-қутқарув техникалари кўрсатилган манзилга соат 23:04 да етиб борган ва ёнғин соат 23:06 да тўлиқ ўчирилган.

Расмий маълумотга кўра, ҳодиса оқибатида жабрланганлар қайд этилмаган. Ёнғин келиб чиқиш сабаблари юзасидан тегишли тартибда текширув ишлари олиб борилади.