FT: Москвада яширинган Марсалек миллиардлаб пулларни ювиш билан шуғулланган тармоққа боғлиқ бўлган

Германия адлия тизимидан қочган Ян Марсалек бутун дунё бўйлаб россиялик олигархлар ва гиёҳванд модда савдогарлари фойдаланган, миллиардлаб пулларни ювиш билан шуғулланган тармоқ билан боғланган бўлган, деб ёзади Financial Times британ нашри.

Фото: Picture Alliance

Wirecard молиявий компаниясининг собиқ операциялар директори, Германия адлия тизимидан қочиб Москвада яшириниб юрган Ян Марсалек миллиардлаб пулларни ювишга оид схема билан боғланган. Бу ҳақда Financial Times газетаси жума, 21 ноябр куни Буюк Британиянинг Миллий жиноятларга қарши кураш агентлиги (NCA)га таяниб хабар берди.

NCA янги ҳисоботи Smart ва TGR компанияларига доир йиллар давомида олиб борилган терговга бағишланган. Ушбу компаниялар криптовалюталардан фойдаланиб, пулларни жиноятчиларга ва санкциялар остидаги шахсларга ўтказиб берган. Бу тармоқдан, жумладан, Россия олигархлари ва гиёҳванд моддалар савдогарлари фойдаланган.

Smart компаниясига россиялик Екатерина Жданова раҳбарлик қилган. АҚШ унга нисбатан санкция жорий этган, ҳозирда у Францияда ҳибсда сақланмоқда. TGR бошида эса Украина фуқароси Жорж Росси турган, у ҳам АҚШ санкциялар рўйхатига тушган.

TGR Group АҚШ санкциялари остидаги «Керемет» қирғиз банкининг назорат пакетини сотиб олиш билан боғланган. NCA таъкидлашича, ушбу банкни сотиб олишдан мақсад Россияга қаратилган ғарб санкцияларини четлаб ўтишни енгиллаштириш ва шу орқали, хусусан, РФнинг мудофаа ва аэрокосмик тармоқларини қўллаб-қувватлаш бўлган.

Financial Times’нинг ёзишича, Россия махсус хизматлари айнан шу тармоқдан Буюк Британиядаги, таркиби болгар фуқароларидан иборат жосуслик ташкилотини молиялаштириш учун ҳам фойдаланган. Лондондаги манбаларга кўра, бу тузилмага Ян Марсалек раҳбарлик қилган.

Марсалек 2020 йил июн ойида Wirecard компанияси ҳисобларидан 1,9 млрд евро йўқолишига оид можаро авжида Германиядан Россияга қочиб кетган. Ўша ойнинг ўзида компания «ҳаддан ташқари қарздорлик»ни баҳона қилиб, банкротлик ҳақида ариза берган.

«Досье» маркази ва Süddeutsche Zeitung газетасининг 2021 йилги журналистик суриштируви натижасига кўра, Ян Марсалек Россия паспортини сохта исм — Герман Баженов номига олган. Der Spiegel’нинг эслашича, Марсалекка нисбатан Буюк Британия ва Австрияда ҳам Россия разведкаси фойдасига жосуслик қилиш иши бўйича терговлар олиб борилмоқда.

Британ терговчилари маълумотларига кўра, Марсалек Москва ва болгар фуқароларидан иборат гуруҳ ўртасида воситачи сифатида марказий рол ўйнаган; бу гуруҳ Россия махсус хизматлари топшириғига биноан, жумладан, Христиан Грозев каби журналистлар ортидан кузатув ўрнатган. Австрия тергови материалларига кўра, Марсалек «Венадаги разведка ячейкаси» таркибига кирган, унинг имкониятлари ва салоҳияти Россия махсус хизматлари томонидан фойдаланилган, деб ёзган эди Der Standard газетаси.