Лавров яна бир Россия делегацияси таркибидан чиқарилди

Россия ташқи ишлар вазири Сергей Лавров 2022 йилдан бери илк бор ЕХҲТ ташқи ишлар вазирлари кенгаши йиғилишида иштирок этмайди. Россия ТИВ расмий вакили Мария Захарованинг 27 ноябр, пайшанба куни маълум қилишича, 4–5 декабр кунлари Венада бўлиб ўтадиган учрашувда Россия делегациясига Лавров эмас, унинг ўринбосари Александр Грушко раҳбарлик қилади. Захарова нега делегация бошлиғи ўзгаргани сабабларини айтмади.

Бундан олдин Сергей Лавров “катта йигирматалик” (G20) саммитида Россия делегацияси раҳбари мақомини йўқотган эди. Бу форумга Россия президенти Владимир Путин Кремл маъмурияти раҳбарининг ўринбосари Максим Орешкинни юборди. Лавров Малайзиядаги ASEAN саммитига ҳам бормади – у ерга Россиядан бош вазир ўринбосари Алексей Оверчук жўнатилди.

Reuters агентлиги маълумотларига кўра, АҚШ президенти Доналд Трамп Украина бўйича Будапештда режалаштирилган саммитни бекор қилганидан сўнг Лавров йирик халқаро тадбирларда деярли кўринмай қўйди. Шундан кейин АҚШ “Роснефть” ва “Лукойл” компанияларига нисбатан санкциялар жорий қилди — бу Трампнинг Оқ уйга қайтганидан бери Россияга қарши илк бевосита чекловлар эди.

Будапештдаги юқори даражадаги учрашув 20 октябр куни Лавровнинг АҚШ давлат котиби Марко Рубио билан телефон орқали суҳбатидан сўнг бекор қилинган. Ўша суҳбатда саммит шартлари муҳокама қилинган эди. Агентлик суҳбатдошларининг айтишича, Трамп музокаралардан воз кечишга айнан Рубио тавсиясига кўра қарор қилган: Лавров гўёки Украина масаласида ултиматив талаблар қўйган.

Шундан бери, Лавровнинг ўзи тан олганидек, АҚШ давлат котиби у билан бошқа боғланмаган. Россия ташқи сиёсат идораси раҳбари шунингдек 5 ноябр куни Россия Хавфсизлик кенгаши мажлисида ҳам қатнашмади — ўшанда эҳтимолий ядровий синовлар муҳокама қилинган эди. 12 ноябр куни Москвада бўлиб ўтган Россия–Қозоғистон музокараларида ҳам у иштирок этмади.

Шу билан бирга, Владимир Путин Трамп билан саммит бекор бўлганидан кейин Сергей Лавров “ғазабга учрагани” ҳақидаги даъволарни кескин рад этди.

“Қандайдир ёлғон нарса. Лавров ҳеч қандай ғазабга учрагани йўқ. Унинг ўз иш жадвали бор. У менга ҳисобот берди, қаерда, қачон, нима билан шуғулланишини айтади. Шунга мувофиқ ишлаяпти. У америкалик ҳамкорлар билан учрашувга тайёрланяпти”, — деди Путин 27 ноябр куни Бишкекка қилган ташрифи якунларига бағишланган матбуот анжуманида.

Россия президенти матбуот котиби Дмитрий Песков ҳам бундан олдин “Лавров билан ҳаммаси жойида” эканини айтган эди. ТИВ раҳбарининг ўзи эса саммит бекор қилинишига “парда ортидан берилаётган маълумотлар” сабаб бўлганини, гўёки Трампга шундай махфий ахборот етказилганини айтди ва бу маълумотлар “қайдан ва кимдан келганини” билмаслигини таъкидлади.