Хизмат йўқ, лекин тўлов бор: 5 та чиқинди ташиш корхонасининг қонунбузарлиги аниқланди

Рақобат қўмитасининг Тошкент вилояти ҳудудий бошқармаси вилоятда аҳолига маиший чиқинди ташиш хизмати кўрсатилиши ҳолатини ўрганиб чиқди.

Ўрганишлар давомида бир қатор қонунбузилишлар, хусусан айрим хонадонлардан чиқиндилар умуман олиб кетилмаган бўлса-да, уларга тўловлар ҳисобланган ва хизмат белгиланган даражада кўрсатилмаган ҳолатлар ҳам аниқланди.

Шу сабабли “Rahnamo Servis”, “Zero-Waste”, “Zangiota Obodon”, “Angren Bunyod Fayz” ва “Ohangaron Sanitariya Tozalash” МЧЖларга жами 250 мингга яқин истеъмолчига 8,8 млрд сўмдан ортиқ маблағни қайта ҳисоб-китоб қилиш талаби қўйилди.

Шунингдек, қонунбузилиш ҳолатини бартараф этиш ва келгусида йўл қўймаслик юзасидан кўрсатма берилди.

“Рақобат қўмитаси томонидан республикамизнинг ҳудудлари кесимида истеъмолчиларнинг ҳуқуқларини ҳимоя қилиш мақсадида бу борадаги тизимли ўрганишлар давом эттирилмоқда”, дейилади хабарда.

Эслатиб ўтамиз, 2025 йил ноябр ойидан эътиборан Тошкент шаҳрида чиқинди тўловидан қарздор абонентларга электр энергияси учун тўлов қилиш имконияти чеклаб қўйила бошланди. Бундай тартиб декабр ойидан бошқа ҳудудларда ҳам йўлга қўйилиши кўзда тутилган.

Аввалроқ солиқдан қарзи бор аҳолининг ҳам электр энергиясига тўлов қилиш имкониятини чеклаш бўйича Наманган вилоятида тажриба бошланиши маълум бўлганди.