Чехия президенти Андрей Бабишни бош вазир этиб тайинлайди

Чехия президенти Петр Павел, Андрей Бабиш ўзига тегишли бўлган мамлакатдаги энг йирик кўп тармоқли концерн — Agrofert’дан воз кечиб, манфаатлар тўқнашуви масаласини ҳал қилгандан сўнг, уни бош вазир лавозимига тайинлашини билдирди. Давлат раҳбари бу ҳақда пайшанба, 4 декабр куни, ўзининг X ижтимоий тармоғидаги саҳифасида маълум қилди.

«Андрей Бабишнинг аниқ ва тушунарли ёндашувини юқори баҳолайман. У бизнинг келишувимизни бажарди ва манфаатлар тўқнашувини ҳал этиш йўлини омма олдида эълон қилди. Шу муносабат билан мен уни сешанба, 9 декабр куни соат 9:00 да бош вазир этиб тайинлаш тўғрисида қарор қабул қилдим», — деб ёзди Павел.

Бу хабардан тахминан бир соатча олдин Бабиш ўзининг X саҳифасида президентнинг бош вазир этиб тайинлаш шартини бажаришини, яъни Agrofert’дан «қайтарилмас тарзда воз кечишини» эълон қилган видео жойлаштирди. Миллиардер қўшимча қилишича, у ҳатто сиёсатдан кетганидан кейин ҳам корхона бошқарувини қайта қўлга олмайди. Унинг сўзларига кўра, 250 дан ортиқ компанияни ўз ичига олувчи концернни мустақил шахслар бошқаради, у вафот этганидан кейин эса компанияни унинг фарзандлари мерос қилиб олади.

Октябр ойи бошларида ўтказилган икки кунлик сайловлар натижаларига кўра, мамлакат парламентининг қуйи ва энг нуфузли палатаси — депутатлар палатасининг янги таркиби тўрт йилга шакллантирилди ва энг кўп овозни (34,51 фоиз) Бабиш бошчилигидаги ўнг «Норози фуқаролар акцияси» (ANO) партияси тўплади. Илгари миллиардер Чехия молия вазири (2014–2017) ва бош вазири (2017–2021) сифатида ишлаган, сўнгги йилларда эса мухолифатда қолаётган эди.

Ноябр ойида ANO яна икки ўнг партия билан коалиция келишувини имзолади — улардан бири «Автомобилчилар» бўлиб, унинг энг таниқли аъзоларидан бирига расизм ҳамда бошқа айбловлар қўйилган. Иккинчиси эса НАТО ва ЕИни танқид қиладиган, парламентнинг янги спикери Томио Окамура раҳбарлик қилаётган «Эркинлик ва тўғридан тўғри демократия» партиясидир. Ушбу уч сиёсий куч вакиллари депутатлар палатасидаги 200 ўриндан 108 тасини эгаллайди.