Ўзбекистонда одамсимон роботлар ишлаб чиқарилиши мумкин

«Ўзэлтехсаноат» уюшмаси ҳамда Жанубий Кореянинг «Robotis» компанияси ўртасидаги англашув меморандуми шуни назарда тутади.

Фото: Getty images

Жанубий Кореяда ўтказилган Ўзбекистон–Жанубий Корея бизнес давра суҳбати якунида «Ўзэлтехсаноат» уюшмаси ҳамда Жанубий Кореянинг робототехника соҳасидаги етакчи компанияларидан бири «Robotis» ўртасида англашув меморандуми имзоланди.

Ҳужжат Ўзбекистонда одамсимон роботлар ишлаб чиқариш, робототехника саноатини ривожлантириш учун зарур бўлган технологик база, ишлаб чиқариш қувватлари ва малакали кадрлар тайёрлаш тизимини яратишни назарда тутади.

Тадбирда Ўзбекистон бош вазири ўринбосари Жамшид Хўжаев бошчилигидаги ҳукумат делегацияси иштирок этди.

Учрашувда иқтисодий алоқаларни кенгайтириш, инвестиция лойиҳаларини жадаллаштириш, юқори технологиялар ва саноат тармоқларида қўшма ташаббусларни ривожлантириш масалалари муҳокама қилинди.