Салоҳнинг демарши. Нега бундай бўлди ва буёғига нима бўлади?
|01:53 / 10.12.202519 93425 мин
Мисрлик футболчининг чиқиши «Ливерпул»даги инқироз янада жиддийлаштирди.
Фото: Robbie Jay Barratt/Getty ImagesФото: Robbie Jay Barratt/Getty Images
«Лидс»га қарши ўйиннинг сўнгги дақиқаларида ғалабани қўлдан чиқарган «Ливерпул»да инқироз давом этаётган бўлса-да, ўйиндан кейин ушбу ўйиндаги вазиятлар, Слотнинг у ёки бу тактик қарорлари четга чиқди – барчаси клубнинг тирик афсонаси Муҳаммад Салоҳнинг интервюси соясида қолиб кетди. Мисрлик футболчи етти дақиқалик нутқида мураббий билан ҳеч қандай муносабат қолмаганидан тортиб, клуб унга нисбатан ноҳақлик қилаётганигача айтиб берди. Табиийки, айни дамда бутун инглиз матбуоти шу ҳақида ёзмоқда. Келинг аввал, мавзуга чуқурроқ кириш учун бир йил орқага, 2024 йил охирига қайтамиз.
Салоҳнинг қолиши тўғри қарормиди?
«Декабр ойи келяпти, мен эса ҳали ҳам клубдан янги шартнома олмадим. Айни дамда «Ливерпул»да қолишимдан кўра, бу ердан кетишим эҳтимоли каттароқ. Нафақага чиқмоқчи эмасман, шунчаки бор эътиборимни ушбу мавсумга қаратганман, мақсадим – Англия чемпиони бўлиш, Чемпионлар лигасини ҳам ютишга умид қиламан. Ҳафсалам пир бўлди, кўрамиз, кейин нима бўларкин». Ўтган йил ноябрида «Саутҳэмптон»га қарши ўйинда дубл қилиб, иродали ғалабага (3:2) ҳисса қўшгач, узоқ танаффусдан сўнг журналистлар қаршисига чиққан Муҳаммад Салоҳ шу гапларни айтганди.
Шундан кейинги ўйинда Чемпионлар Лигаси гуруҳ босқичида «Реал» тиз чўктирилди – 2:0. АПЛ доирасидаги кейинги турда эса «Ливерпул» ўз таъқибчиларидан бири «Манчестер Сити»ни «Энфилд»да худди шу ҳисобда мағлуб этди. Ливерпулда байрам. Кайфият зўр. Учрашувда бир гол ва ассист қайд этиб, энг яхши ўйинчи деб топилган Салоҳ эса яна эски мавзуни очди: «Бу менинг «Энфилд»да «Манчестер Сити»га қарши сўнгги ўйиним бўлиши мумкин. Шунинг учун тўлиқ завқ олишга ҳаракат қилдим».
Ҳозирги муаммолар олдида ҳеч нарса эмас, аммо кўп бўлмади, атиги бир йил олдин АПЛда 9 очколик фарқ билан жадвални бошқариб турган, Чемпионлар Лигасида эса йўқотишсиз бораётган клубнинг ягона муаммоси – Муҳаммад Салоҳ, Виржийл ван Дейк ва Трент Александр-Арнолдни жамоада қолишга кўндириш, бошқача айтганда, каттароқ маош билан янги шартнома имзолаш эди.
Ҳамма ғалабани нишонлаётган пайтда ўз дарди билан босим қилиш бироз худбинлик, Жейми Каррагер яқинда унинг айнан шу хислатини танқид қилган.
«Биз муваффақиятсиз ўйинлардан кейин фақат Виржийл ван Дейк мухлислар қаршисига чиқишига ўрганиб қолдик. Лекин қолганлар қани? Салоҳ қани? Уни фақат муваффақиятли ўйинидан кейин янги шартнома сўрашини кўрамиз», – деб асабийлашганди «Ноттингҳэм Форест»дан учралган мағлубиятдан кейин Жейми Каррагер.
Табиийки, бир йил олдин «Ливерпул» жуда катта босим остида эди ва 32 ёшли футболчига АПЛнинг энг катта маошини таклиф қилишдан бошқа йўли қолмаганди. Бу хато эмасди албатта, ўша даврда Муҳаммад Салоҳ нафақат Англияда, балки дунёнинг энг яхшиси бўлиб турган, «Ливерпул»нинг қарийб барча голлари айнан мисрлик ҳужумчи орқали юзага келаётганди. Келажакни ўйлаб қандайдир стратегик режалар қилиш, масалан, футболчининг зўр даврида у билан хайрлашиб, янги саҳифа очиш варианти бутунлай йўққа чиққан – мухлислар буни ҳеч қачон қабул қила олишмасди. Тасаввур қилинг, Муҳаммад Салоҳ талаб қилаётган маошни юқори деб ҳисоблаб, у билан хайрлашиш, ёзда эса 400 миллион евродан ортиқ маблағни янги трансферлар учун сарфлашни тушуниш мумкин бўлармиди?
Мавзуга оид
Шунинг учун янги шартномани қўлга киритгач, Салоҳнинг кўрсаткичлари тушиб кетишида ёки янги мавсумда ёмон формада эканида клубнинг айби йўқ. Ҳозирдан туриб, вақтида у билан хайрлашиш кераклигини айтиш, юлдузлар билан вақтида хайрлашадиган «Реал»ни мисол қилиш мумкин, аммо бир йил олдин «Ливерпул»да бошқа йўл қолмаганди.
Лидсдаги «бомба»
Муҳаммад Салоҳнинг бу сафарги «бомбаси» ғалабадан кейин эмас, «Лидс Юнайтед»га қарши ўйиндаги оғриқли дурангдан сўнг портлади, ёзги трансферлар ойнасида катта хатолар қилган клуб ва охирги 10 ўйинда атиги 2 ғалабага эришган Арне Слотнинг энг ҳимоясиз даври танланди. Дастлабки турларда Салоҳ ўйнай олмаётгани, мураббий уни захирада қолдириб, Фримпонгми, Киезами, кимни бўлса ҳам тушириш кераклигини айтаётганлар бирданига Салоҳнинг армиясига айланди. Бу табиий, чунки Салоҳсиз ҳам натижалар зўр бўлиб кетмади – бир ғалаба ва икки дуранг – бу бурилиш эмас. Зеро шундоқ ҳам «Слот аут» кампанияси кетаётган пайтда сўнгги натижаларга энг кам даражада боғлиқ бўлган, аслида эса клуб афсонасининг ёнида туриш энг мантиқли йўлдек кўринади – «Ана, ахир Муҳаммад Салоҳнинг ўзи ҳам айтяпти-ку, демак мураббий эплай олмаяпти. Биз ҳақ эканмиз». Зўр позиция.
Муҳаммад Салоҳ ҳақлимиди ва ҳаммаси ўзи нимадан бошланди?
Аввало айтиш керакки, «Ливерпул»нинг жорий мавсумдаги муаммолари етарлича ва Салоҳнинг формаси улардан бири холос. Аслида ҳаммаси ёзги трансфер ойнасидан бошланди. Ҳа, Вирц, Исак каби футболчилар кейинроқ ўйнаб кетиши мумкин, Слот айтганидек, улар уч ойга эмас, бир неча йилга сотиб олинган. Аммо шуни ҳисобга олган ҳолда таҳлил қилганимизда ҳам клуб томонидан сарфланган пулларда мантиқсизлик борлиги, зарурроқ позициялар кучайтирилмагани ойдинлашади.
Диогу Жотанинг вафотидан ташқари, «Ливерпул» ёзда Дарвин Нунез, Луиз Диас, Трент Александр-Арнолд, Ҳарви Эллиот каби футболчиларни ҳам йўқотди. Уларнинг ўрнига келган футболчилар эса услубан фарқ қилади ва табиийки, жамоанинг қайтадан қурилишига эҳтиёж пайдо бўлади. Фримпонг Трент эмас, Диас берадиган иш ҳажмини Вирц бажара олмаслиги мумкин, шунингдек, марказий ҳимоя чизиғи, узоқ йиллардан бери зарурат бўлган таянч зонасидаги муаммолар ҳал қилинмади. Бунинг ўрнига битта позицияда ўйнайдиган Исак ва Экитике жуфтлигига 200 миллион евродан ортиқроқ пул сарфланди.
Табиийки, бу ўзгаришлар нафақат «Ливерпул» ўйинига балки Муҳаммад Салоҳнинг кўрсаткичларига ҳам, унинг майдондаги ўрнига ҳам жиддий таъсир кўрсатди. Салоҳ ҳужумда Дарвин, Диас ва Жота каби футболчилар билан самарали боғламлар қура олган, унинг ўнг қанотдаги Трент билан тандеми эса Салоҳга хавфли зоналарда тўпга эга бўлиш, кўпроқ зарба бериб, голлар уришга имконият яратарди. Янги таркибда урғу ўзгарди, Салоҳ ўйиндан узилиб қолгандек эди, футболчи учун қулай тизим йўқ бўлиб қолди.
xPV деб аталадиган кўрсаткич бор – жамоанинг ҳар бир пасидан сўнг майдондаги вазиятнинг яхши ва ёмон томонга ўзгаришини акс этади. Худди шахматда ҳар бир юришдан кейин позиция ўзгаргандек. Ўтган мавсумда xpV бўйича энг яхши жуфтликлар бешлиги жамоада мана шундай бўлган экан:
Салоҳдан Сабослаига
Трентдан Салоҳга
Салоҳдан Диасга
Сабослаидан Салоҳга
Диасдан Салоҳга
Қаранг, ҳар бирида Муҳаммад Салоҳ иштирок этяпти, лекин бошқа нуқта ҳам бор – унинг аксар шериклари айни пайтда жамоада эмас. Сабослаи эса ўтган мавсумдаги ролда ўйнамаяпти, асосан орқадаги бўш нуқталарни ёпиш билан шуғулланмоқда.
Салоҳ ўз интервюсида эслаган Ҳарри Кейн узоқ вақт гол урмай юриши мумкин, аммо у тўпурар бўлиши билан бирга, жамоавий футболчи ҳам – кўп ҳимояланади, ортда ўйин ташкил қилишда иштирок этади, қайсидир маънода Роберто Фирминонинг вазифаларини ҳам бажаради. Голларсиз Салоҳ эса кўпроқ муаммога айланиши бор гап.
Ўтган мавсумда Салоҳ энг яхши даврини ўтказаётган пайтида ўзи бир сирни очганди – у Слотдан ҳимоявий вазифалардан озод қилишни сўрагани ва эвазига жуда кўп голлар ва ассистлар беришга ваъда берганини айтганди. Футболчи ўз ваъдасида турди – 34 гол ва 23 ассист амалга оширди. Агар жамоа Чемпионлар Лигасида узоқроққа борганида, Салоҳ «Олтин тўп» учун асосий даъвогарга айланган бўларди.
Табиийки, ҳар қандай футболчидан бу даражада самара келиб турса, мураббий баъзи принциплардан воз кечади, айнан шу футболчининг устунликларини намоён қиладиган, камчиликларини ёпадиган ечимларга қўл уради. Таркибдаги бошқа футболчилар ҳам бу ҳолатни тушуниши, навбати билан юлдуз учун кўпроқ қора ишларни қилиши мумкин, ахир Салоҳ жамоага голлар билан жавоб бераётганди.
Жорий мавсумда эса Салоҳнинг кўрсаткичлари пасайиб кетди – 4 гол ва 2 ассист. Шундан бир гол пеналтидан. Албатта, бу бутун жамоа услубини Салоҳга мослаш учун етарли эмас. Шу ёмон мавсумида ҳам 4+2 ёмон эмас, жамоада 5-кўрсаткич, бошқа жамоаларда шу позицияда ўйнаб юрган ва муаммо бўлиб кўринмаётган аксарият вингерларникидан яхши. Аммо у учун қилинаётган қурбонликлар эвазига Салоҳ нафақат энг яхши тўпурар, балки бошқалардан катта фарқ билан олдинда бўлиши керак эди. Худди ўз вақтида Роналду ва Месси, Салоҳнинг ўзи, ҳозирда Эрлинг Ҳоланд голлар эвазига кўп вазифалардан озод қилингани каби.
Жамоа натижалари орқага кета бошлагач, Салоҳнинг ҳимояга ёрдам бермаслиги муаммоси қалқиб чиқа бошлади. Илгари Салоҳ бир хатога икки гол билан жавоб берган бўлса, энди гол йўқ, хатолар эса натижага тўғридан тўғри таъсир қила бошлади.
«Биз Салоҳнинг ортга ҳадеб қайтавермаслигини билардик. Шунинг учун унинг қанотига урғу бердик ва ҳал қилувчи гол ўша томондан урилди», – деганди 2:1 ҳисобидаги ғалабадан сўнг «Челси» ҳимоячиси Кукуреля.
Умуман, «Ливерпул» ўтказиб юборган голларда энг кўп ассистентлар рақибларнинг чап қанот ҳимоячилари экан – яъни Салоҳ қўриқлаши керак бўлган футболчилар. Яна бир мисол, дастлабки 12 турда «Ливерпул» дарвозасига ўйиндан яратилган xG кўрсаткичи ўртача 0.73 бўлган экан. Салоҳ захирада қолган сўнгги беш бўлимда – 0.21. Яъни рақиблардан келадиган хавф қарийб 3,5 баробарга камайган.
Баъзилар Гакпо ёки Конате ҳам яхши ўйнай олмаётган бўлса-да, нега айнан Муҳаммад Салоҳ захирада қолдирилаётганини тушунмаётган бўлиши мумкин, сабаб шу ерда. Агар тўп билан ўйинга қарасак, ҳа Гакпо ҳам кўп хато қиляпти, тўғри, лекин бу вазиятда, яъни тўп билан ҳар иккиси ҳам ёмон экан, биз энди тўпсиз ҳолатда қайси бири фойдалироқ эканини ўлчашимиз керак. Натижани тахмин қилиш осон.
Яъни олдинги чизиқда муаммоларга учраган «Ливерпул»нинг ўзига бўлган ишончи пасайган, ўтказиб юборилган ҳар бир гол ўйинга ва якуний натижага таъсир қила бошлагач, Слотнинг ўйинни бироз прагматиклаштириши, ҳимояга эътибор қаратиши мантиқан тўғри ечимга ўхшайди. Муҳаммад Салоҳнинг сўнгги учрашувларда захирада қолиши кимнидир айбдор қилиш учун ёки сиёсий қарор эмас, ғирт футболча, мураббийлик ечимларидан бири эди.
Слотнинг бу қарори энг тўғри қарор эмасдир. Балки қайсидир мураббий Салоҳ билан бугунгидан зўр натижаларга эришиши мумкин эди, қўшиламан, шундай мураббийлар бор. Аммо айни пайтда жамоада бош мураббий Слот ва унинг ечимлари бирламчи бўлади.
У ҳолда нега Салоҳ бу қадар норози бўлди?
Интервюнинг қайси жиҳатларига эътибор бериш керак?
Клоппнинг сўнгги мавсумини эсласангиз керак. «Вест Ҳэм»га қарши ўйинда захирага олингач, Салоҳнинг мураббий билан даҳанаки жанги кадрларга тушиб қолган, муҳокамаларга сабаб бўлганди. Ўша вазиятни «мен гапирсам ҳаммаси ёниб кетади» деб изоҳлаган Салоҳ учун уч ўйинда захирада ўтиришга жавобан кечагидек интервю билан кифояланишини анча босиқлик дейиш ҳам мумкин. Муҳаммад Салоҳни тўлиқ тушуниш учун ушбу интервюнинг айрим нуқталарини кўриб чиқиш керак.
Эътибор беринг, Салоҳ «менга панд беришди», «автобус остига ташлашди» деганда фақат Арне Слотни эмас, клубни кўрсатмоқда. «Кимдир мени айбдор қилмоқчи» дегани ҳам мавҳум кишилар ҳақида.
Юқорида янги шартнома ҳақида эсланди. Маълумки, бундай келишувлар фақат молиявий шартларни ўз ичига олмайди. Масалан, клуб лойиҳани тақдим этаркан, футболчининг шартнома муддатидаги роли ҳам аҳамиятга эга бўлади. Менимча, катта эҳтимол билан, Муҳаммад Салоҳга бошқача ваъда берилган – ёзда янги катта трансферлар амалга оширилиши, Салоҳ янги лойиҳада ҳам марказий фигура бўлиб қолиши, ўйин унинг атрофида қурилиши, клуб барча мусобақаларда ғолиблик учун курашиши ва билвосита футболчининг «Олтин тўп» учун курашдаги имкониятлари ошиши ҳақидаги қандайдир кафолатлар бўлган. Албатта, жиддий клуб ҳеч кимга асосий таркибдан жой кафолатламайди, аммо агар футболчи ўз формасини сақласа, бундай ваъдаларга амал қилинади, трансфер нишонлар ҳам айнан ўша йўналишда олиб борилади.
Айнан шу нуқтада ким ҳақ эканини аниқлаш қийин. Слот Салоҳ учун барчаси муҳайё қилингани, Салоҳ захирага олиниши формаси билан боғлиқлигини маълум қилди. Салоҳ эса унинг кўрсаткичларидаги пасайиш айнан клубдаги трансферлар ва мураббийнинг тактикаси билан боғлиқ эканини айтганди. Ҳар ким ўз хулосасини чиқариши мумкин.
Аммо Салоҳнинг интервюсидаги бир мулоҳаза жуда ноўрин ва бу футболчига қарши ишлайди – «мен жамоа учун шунча йил кўп нарса қилдим, нега энди асосий таркибдаги ўрним учун курашашим керак?» дейиши бугунги даврдаги спорт қадриятларини тан олмаслик ҳисобланади. Сиз Салоҳни ҳар қанча қўллашингиз мумкин, аммо бундай фикрлаш ҳам футболчи имижига, ҳам жамоа муҳитига салбий таъсир кўрсатиши аниқ.
Мисрлик ҳужумчининг интервюси шу қадар серқирраки, жуда кўп мавзуларни қамраб олади. Мисол учун, Ҳарри Кейн ҳақидаги фикрлар. Салоҳ ўз вақтида узоқ вақт гол ура олмаган Кейнга матбуот имкон бергани, унга эса бошқача муносабат бўлаётганини айтмоқда. Шу ўринда яқинда Жуд Беллингҳэм билан терма жамоада содир бўлган воқеалар ёдга тушади. Жуд ўзининг алмаштиришини эмоционал қабул қилганда жуда кўп танқидларга учради ва ўшанда «Арсенал»нинг ўтмишдаги юлдузи Иан Райт қизиқ фикр айтганди.
«Инглиз матбуоти шунақа. Кимдирлар қора танли суперюлдузга тайёр эмас» – деганди у бир подкастда, – «улар қора танлилардан бошқа нарсани кутишади. Кўчага чиқдингми, жим юришинг керак. Масалан, Кантени ҳамма яхши кўради, чунки у камтар йигит. Лекин қачонки, Погба ё Беллингҳэм бўлса, агар қора танли футболчи калондимоғ ҳам бўлса, улар буни кўтара олишмайди. Қора танлилар ўз фикрини бу шаклда айтишига кўникишмаган».
Ҳарри Кейннинг шунақа ҳолатга тушиб қолишини тасаввур қилсак, кўпчилик уни ёвузлар билан курашаётган қаҳрамонга айлантириши мумкинлигида у ва Салоҳ характери ўртасидаги фарқ ҳам рол ўйнаса-да, ўша ердан туриб гапираётган ва буни танасида ҳис қиладиган Иан Райтнинг фикрларида ҳам жон бор – барибир уларга Муҳаммад Салоҳ яхши, одобли ва эътирозсиз ҳолатда ёқади. Инглизлар расизмга қарши кураш йўлида ҳар ўйинда плакат кўтариб чиқиши, Кавани ёки Фоденни жазолашлари мумкин, аммо қўлда тутиб бўлмайдиган яширин расизм борлигини бутунлай инкор этиб бўлмайди. Салоҳ муваффақиятсиз бир неча ой учун керагидан ортиқ танқид ва ҳақоратларни қабул қилган бўлиши мумкинлигини ва клуб ўз афсонасини ҳимоясиз қолдирганини ҳам эътиборга олиш керак.
Салоҳ нимани кўзлаган?
Футболчининг интервюси албатта олдиндан тайёрланган, етти дақиқалик нутқ мазмуни олдиндан белгиланган ва тайминг ҳам яхши танланган бўлса-да, аввалги чиқишлардан фарқ қилади. Салоҳнинг шартнома ҳақидаги чиқишларида аниқ стратегия бор эди – шу орқали клубни ҳаракатга ундаш, мухлислар ёрдамида босим қилиш. Аммо кечаги чиқишида мотивни топиш қийин. Ахир биргина мана шу эътирозни деб клуб Арне Слотдан воз кечмаса керак, тўғрими? Бундай ўйлайдиган даражада аҳмоқмасдир футболчи?
Бунинг устига футболчи тушиб қолган ҳолат узоқ давом этиши мумкин эмасди. Захира ўриндиғида ўтказилган уч ўйин аслида бир ҳафта холос – жамоа уч ўйинни шу муддатда ўтказди. Келаси ҳафта эса Салоҳ Африка Миллатлар кубогига жўнаб кетади ва бир ярим ой жамоа ихтиёрида бўлмайди. Бундай катта муддатда «Ливерпул» ўзини ўнглай олмаса, «Салоҳ – муаммо» деган тезис ҳам ўз аҳамиятини йўқотар, ҳатто Слот истеъфога кетиши мумкин эди. Футболчи Африкадан яна афсона сифатида қайтган бўларди.
Агар «Ливерпул» яхши ўйнаб кетса, жамоа атрофидаги негатив камайган, Салоҳ иштирокисиз ўйиндаги турли муаммоларга ечим топилган бўлади. Бемалол кучли ва босим кам жамоага Салоҳни қайта интеграция қилиш мумкин эди. Ҳозирда у шохдан бу шохга сакраб ечим қидираётган Слот Салоҳнинг позицияси ҳақида чуқурроқ ўйлаб кўриши мумкин бўларди. Ҳар ҳолда сўнгги кучли «Ливерпул» Салоҳ билан бўлган, бир неча ой ёмон ўйин учун осонликча воз кечиб юборилмасди.
Яъни ҳар икки ҳолат ҳам Муҳаммад Салоҳнинг фойдасига ишлайдиган вазиятда кўприкларни ёқишдан нима наф бор?
Бундан хулоса чиқариш мумкинки, Салоҳнинг чиқиши мураббийни ағдариш, ниманидир ўзгартиришга қаратилган стретегик юриш эмас, шунчаки эмоцияларнинг портлаши, холос. Бу нафақат захирада ўтказилган уч ўйин, балки августдан бери йиғилиб келган, «Салоҳ керак эмас» деб асосий муаммоси сифатида уни кўраётган мухлислардан тортиб, телевизорда танқид қиладиган Жейми Каррагерларни ўз ичига олади.
Яқинда футболчи ўз инстаграм саҳифасида «Ливерпул» билан боғлиқ барча эслатмаларни ўчириб юбориши ҳам қайсидир маънода мана шу интервюнинг бошқача шакли эди дейиш мумкин. Яъни Муҳаммад Салоҳ келганидан бери «Ливерпул» афсонаси, клубнинг барча ютуқларидаги асосий шахс фаолиятида биринчи марта танқидий нишонлар остида қолди ва клуб бунга жим қараб турди. Бу ҳам етмагандек, мураббий уни захирага ўтказиб, ўша «антисалоҳчи»ларни ҳаққа чиқариб ҳам қўйди. У ёлғиз қолди. Уни энди яхши кўришмайди. Жуда оғир ҳолат. Ҳа, Салоҳнинг бу ҳаракатида жамоани ўйламаслик, эгоизм ётибди, қўшиламан, лекин унинг даражасидаги аксарият футболчиларда бундай бўлиши табиий. Уни тушуниш, унинг дардини англаш мумкин. Шунчаки, бу фикрларини оммага олиб чиқиш орқали у хатога йўл қўйди, ҳам ўзини, ҳам клубни зарба остида қолдирди.
Бу биласизми, нимага ўхшайди? Бир йигит севгилиси учун ҳамма нарсани қилади, йиллаб борини беради. Аммо бир кун келиб қиз бошқасини севиб қолиб, у билан кетса-чи? Йигитнинг бу ҳолатини тўлиқ тушунамиз, унга ачинамиз, бу ҳолатга тушганда ҳар қандай эмоция мумкин эканини биламиз. Аммо у агар бориб қизга пичоқ урса, энди буниси нотўғри. Ҳиссиётлар кўпинча яхши ва ёмон бўлмайди, у олиб борадиган ҳаракатни баҳолашимиз мумкин. Яъни Муҳаммад Салоҳ шу интервюни бериб хато қилди деганда, асло у бутунлай ноҳақ деб билмаслигимиз, эмоцияларини англашимиз ҳам мумкин.
Муҳаммад Салоҳ ўз чиқиши орқали, кимдир билан курашмоқда эмас, шунчаки, сўнгги ойлардаги ҳиссиётларини чиқариб юборди, қайсидир маънода шахсий имижи, пиари учун ҳам ҳаракат қилди. Бу «Ливерпул»нинг ўнг қаноти учун эмас, муҳаббатни қайтариш учун бўлган кураш.
Энди нима бўлади?
Энг муҳими, бош мураббий ва футболчи ўртасидаги ҳар қандай зиддият «ким ҳақ, ким ноҳақ» деган савол остида кўриб чиқилши тўғри эмас. Клуб, жамоа жуда кўп инсонлардан, манфаатлардан ташкил топади. Ўртада жуда кўп шахсий манфаатларнинг тўқнашуви бор – кимдир захирада қолишни истамайди, кимдир ўзи учун яхшироқ позиция хоҳлайди, кимдир агентининг кўрсатмаси билан ҳаракат қилади, кимдир жамоа бошқача ўйнаши керак деб ҳисоблайди ва ҳоказо. Жуда кўп ва фарқли фикрлар.
Ва доим мураббийнинг ёни олиниши – улар доим ҳақ бўлгани учун эмас. Албатта, бу зиддиятлар ичида футболчининг фикри тўғри бўлган ҳолатлар ҳам бор. Муҳаммад Салоҳ ҳам Арне Слотдан кўра ҳақроқ бўлиши ҳам мумкин, буни инкор этиб бўлмайди. Лекин бу ерда масала «ким ҳақлиги» эмас, муаммоларнинг қай тариқа ечилишида. Токи ишлаб турган экан, таркибни мураббий танлаши, унинг айтгани бўлиши, жамоа футболчиси эса унинг қарорларини оммавий муҳокама қилмаслиги керак. Мураббийнинг хатолари кўпайса, натижа ёмонлашса, у истеъфога чиқади, кейин янги мураббийнинг айтгани бўлади. Ҳаммаси оддий.
Клуб томонидан қўйилган дастлабки қадам, футболчининг «Интер»га қарши ўйин учун рўйхатдан чиқариб ташланиши бўлди. Катта эҳтимол билан, АПЛнинг кейинги турида «Брайтон»га қарши ўйинда ҳам бу такрорланади. Кейин эса футболчи Миср билан Африка кубогига жўнаб кетади.
ВВС манбалари ёзишича, Муҳаммад Салоҳ энди «Ливерпул»да бошқа ўйнамайди. Муносабатлар бутунлай бузилган. Аммо масалан Athletic бошқачароқ ёзмоқда – клуб раҳбарияти муаммоларни вақтинча деб ҳисоблайди ва Арне Слотга тўлиқ ишонади ва шу билан бирга Салоҳ шартнома муддати тугагунча (2027 йил ёзи) жамоада қолишини хоҳлашмоқда. Аммо масала қандай ечилади, бу ҳозирча номаълум.
Аслида йўллар жуда кўп. Эсингизда бўлса Лаутаро Мартинес ва Конте ўртасида ўйиннинг ўзида зиддият чиққанда, кейинги машғулотда махсус ринг қуриб мураббий ва футболчи ўртасида жанг ташкил қилишган. Шу тариқа, ҳазиломуз тарзда клуб зиддият барҳам топганини намойиш қилган. Салоҳдан кўра қаттиқроқ чиқиш қилиб, Эрик тен Ҳагни ёлғончиликда айблаган Жейдон Санчо ҳам ҳатто, маълум вақт ўтиб узр сўраб таркибга қайтганди. Яқинда Хаби Алонсо ва Винисиус ўртасидаги зиддиятга ҳам шундай ечим топилди. Муҳаммад Салоҳнинг клубдаги ўрни ва муаммонинг ҳажми юқоридаги мисоллардан каттароқ бўлса-да, бир шартни кўриш мумкин – ҳар қандай ҳолатда Муҳаммад Салоҳ биринчи бўлиб қадам ташлаши лозим бўлади. Оммавий узр сўрайдими ёки клубнинг ичида бу иш ҳал бўлиб, кейин расмий баёнот қилинадими, ҳар қандай ҳолатда футболчидан қадам керак.
Муҳаммад Салоҳнинг ортга чекинишисиз муаммо барҳам топиши, футболчининг таркибга қайтиши, ҳеч нарса бўлмагандек давом этиши мутлақо имконсиз. Бу клубнинг имижига, жамоа ичидаги муносабатларга жиддий зарба бўлади. Ҳаммаси ўша интервюга Салоҳнинг кейинги муносабатига боғлиқ. Акс ҳолда, агар у ўз позициясида қатъий туриб олса, худди бир йил олдин бўлгани каби клуб қаршисида яна ягона йўл қолдиради.
