Сиднейдаги пляжда одамлар ўққа тутилди. Қурбонлар бор

Икки киши пляждаги одамларни ўққа тутган. Камида 12 киши ҳалок бўлган. Ҳужум ижрочиларидан бири оддий фуқаро томонидан қуролсизлантирилган.

{Yii::t(}

Ўтказиб юбориш 6s

Ўтказиб юбориш

14 декабр куни Австралиянинг Сидней шаҳри ҳудудидаги Бонди пляжида отишма рўй берди. Гувоҳларнинг маҳаллий телевидение эфирида айтишича, қора кийинган икки шахс пиёдалар кўпригида турган ҳолда пляждагиларни ўққа тутган. Ижтимоий тармоқларда ҳужум қилган шахслар акс этган видеоёзувлар тарқалган.

Отишма яҳудийларнинг диний байрами ҳисобланган Ханукининг илк кунида рўй берди – бу байрам 14 декабрдан 22 декабргача нишонланади. Отишма бошланган маҳалда пляжда шам ёқиш маросими бўлиб ўтаётганди.

Маҳаллий нашрлар аввалига камида 10 киши ҳалок бўлиб, 60 киши яраланганини хабар қилди.

«Мен ерда қонга беланиб ётган камида 10 кишини кўрдим», деган журналистларга гувоҳлардан бири. The New York Times хабарига кўра, камида ўн киши шифохонага ётқизилган.

Гувоҳлардан бири жами 50 га яқин ўқ овозини эшитганини айтган. Бошқа бир гувоҳнинг сўзларига кўра, отишма 10 дақиқага яқин давом этган. У рўй берган ҳодисани «ердаги жаҳаннам»га қиёслаган.

Бу вақтда пляж ҳудудида икки мингга яқин киши бўлган. Ижтимоий тармоқларда тарқалган кадрларда пляж ҳудудидан юзлаб кишилар ҳар томонга қочиб бораётганини кўриш мумкин.

ABC телеканали мухбири билан гаплашган гувоҳлар аввалига ўқ овозларини мушакбозлик деб ўйлашганини айтишган. Улардан бири пляж яқинидаги ресторанда оила аъзолари билан кечки овқатни қилаётганида отишма бошлангани ва улар дарҳол кийим алмаштириш хонасидаги ўриндиқлар ортига яширинишгани, пляж томондан ярадор ҳолатдаги кишилар уларнинг олдига югуриб келганини айтиб берган.

Сўнгги маълумотларга кўра, ҳужум қилганлар икки киши бўлган. Улардан бири полициячилар билан отишма чоғида ўлдирилган, иккинчиси яраланган ҳолда қўлга олинган, унинг аҳволи оғир деб баҳоланмоқда.

Ижтимоий тармоқларда тарқалган видеога кўра, отишма ижрочиларидан бири ўткинчи фуқаро томонидан қуролсизлантирилган. Видеода машиналар орасида яшириниб турган оддий фуқаролардан бири милтиқли одамга орқадан сездирмасдан яқинлашгани ва уни бўғиб, қуролини тортиб олганини кўриш мумкин.

Аммо ўткинчи қуролни тортиб олганидан кейин уни қўйиб юборган, у эса шеригининг олдига қайтиб, бошқа қуролни олган ва отишмани давом эттирган. У катта эҳтимол билан, ўзини қўйиб юборган шахсни ҳам отиб ташлаган.

Кўп ўтмай полициячилар у ва шеригини ўраб олган ва зарарсизлантирган.

Пойтахти Сидней бўлган Янги Жанубий Уэлс штати бош вазири Крис Миннс матбуот анжуманида отишма оқибатида жами 12 киши ҳалок бўлганини маълум қилди. У рўй берган ҳодисани Сиднейдаги яҳудийлар жамоасига қарши амалга оширилган ҳужум деб атаган. Штат полицияси комиссари Мэл Лэйон 29 киши яраланганини айтган, улардан икки нафари полициячилар. Лэйон амалга оширилган ҳужумни теракт деб баҳолаган. Комиссарнинг қўшимча қилишича, ярадорлар орасида бир ёш бола ҳам бор. Дастлабки маълумотларга кўра, қурбонлар орасида болалар йўқ.

Исроиллик журналист Нафтали Хананиянинг ёзишича, отишма вақтида раввин Эли Шлангер ҳам ҳалок бўлган.

Newsru.co.il нашрига кўра, жабрланганлар орасида Исроил–Австралия кенгаши раиси Арсен Островский ҳам бор, у бошидан жароҳат олган.

ABC телеканалининг ҳуқуқ-тартибот органларидаги юқори мартабали манбаси ҳужум қилганлардан бирининг шахсини очиқлаган – бу Нарвид Акром бўлиб, унинг Сидней шаҳри чеккасидаги уйида тинтув ўтказилган.

Маълум бўлишича, у Покистондан келган меҳнат муҳожири бўлиб, Сиднейда таксичилик қилган.

News.com.au нашрининг полициядаги манбаси бу ҳужумга бир неча ой мобайнида тайёргарлик кўрилган деб ҳисобламоқда.

Воқеа жойида амалиёт давом эттирилмоқда, полициячилар аҳолини бу ҳудуддан узоқроқ бўлишга чақирган. Сўнгги маълумотларга кўра, бу ҳудудда қўлбола портловчи қурилма ҳам топилган. Полиция отишмани телефон ёки видеорегистратор орқали тасвирга олганлардан кадрларни ҳуқуқ-тартибот органларига тақдим этишни сўраган.

Австралия бош вазири Энтони Албаниз Сиднейдаги отишмани «шокка туширувчи ва хавотир уйғотувчи» ҳодиса деб атади. У Миллий хавфсизлик қўмитасининг вазирлар иштирокидаги йиғилишини чақиртирган.

«Биз яраланганлар соғайиб кетиши учун дуо қиламиз… ва вафот этганлар учун ҳам дуодамиз», – деган Исроил президенти Исҳоқ Ҳерцог. У Австралия ҳукуматини «жамиятни заҳарлаётган антисемитизмнинг улкан тўлқинига қарши курашиш чораларини кўриш»га чақирди.

Ҳужум Австралия имомлар кенгаши томонидан ҳам қораланди. «Жамиятимизда бундай зўравонлик ва жиноятларга ўрин йўқ. Айбдорлар тўлиқ ва қатъий жавобгарликка тортилиши керак», – дейилади кенгаш баёнотида.