Тошкент вилоятида қўлбола пиротехника воситалари аниқланди

Тошкент вилояти ИИББ ҳамда унинг қуйи бўлинмалари томонидан бошқа ҳуқуқни муҳофаза қилувчи органлар билан ҳамкорликда пиротехника воситаларининг ноқонуний муомаласига қарши қаратилган профилактик тадбирлар изчил олиб борилмоқда.

Маълум қилинишича, «Хавфсиз ва соғлом юрт» тезкор-профилактик тадбирлари доирасида Янгийўл туманида қўлбола усулда тайёрланган пиротехника воситалари билан боғлиқ ҳолат аниқланган. Хусусан, туманнинг Пахта маҳалласида яшовчи 2010 йилда туғилган фуқаро (У.А.)нинг хонадонида турли ҳажм ва кўринишдаги 110 дона қўлбола пиротехника воситаси борлиги маълум бўлиб, улар белгиланган тартибда ҳужжатлаштириб олинган.

Қайд этилишича, мазкур пиротехника воситалари мустақил равишда тайёрланган бўлиб, кейинчалик сотиш мақсад қилинган.

Шунингдек, Тошкент туманида ўтказилган рейд тадбирлари давомида Gentra русумли автомашина ҳайдовчисининг транспорт воситаси юкхонасида қаттиқ овоз чиқарувчи пиротехника воситалари сақлаб келаётгани аниқланган.

Ҳар икки ҳолат бўйича тегишли тартибда қонуний чора кўрилиб, пиротехника воситалари мусодара қилинган.

https://gov.uz/uz/iiv/news/view/111502