Украина қуролли кучлари Купянскнинг бир қисмини озод қилишга эришди. Аҳён-аҳёнда кичик штурмчи отрядлар қарши ҳужумга ўтиб турган Покровскдан фарқли ўлароқ, Харкив области шарқидаги бу шаҳарнинг ғарбий чеккасиига Украина қуролли кучларининг йирик гуруҳи ташланган. Улар шаҳар жануби-ғарбидаги «Юбилейний» микрорайонидаги кўп қаватли уйларга жойлашган (бироз олдин бу ҳудуд шиддатли жанглар майдонига айланган; Россия кучлари микрорайоннинг бир қисмини назорат қилиб турганди). Бу эса Володимир Зеленскийга шаҳарга жануби-ғарбдан кириш қисмига келиб, селфи олиш имконини берди. Бундан ташқари, украин кучлари шаҳар марказидаги олдинроқ ташлаб кетилган позициялар томон силжишга муваффақ бўлган. Янада муҳими, Украина қуролли кучлари РФ қуролли кучларининг шаҳар шимолидаги мудофаа чизиғига чуқур кириб борди. Бу эса Купянск ичкарисида қолган россиялик штурмчиларга таъминот етказиб бериш масаласини оғирлаштиради. Шу билан бирга, РФ қуролли кучлари Донецк ва Запорижжя областларида муваффақиятли юришларини давом эттирмоқда. Улар Северск шаҳрини эгаллаган ва Украина қуролли кучларининг Гуляйполедаги позицияларини штурм қилмоқда. «Медуза» шарҳида шу ҳақда.
Купянск
Россия қўшинлари сўнгги бир йил ичида Купянскнинг ҳар икки қисмини (шаҳар ўртасидан Оскол дарёси ўтган) эгаллашга бир неча бор уриниб кўрди. Ғарбий соҳилдаги плацдармдан ҳужум қилиш орқали катта ютуқларга эришилди. РФ қуролли кучлари марказдан ўтиб, шаҳарнинг жанубий чеккаларигача етиб келди. Шу билан бирга, шаҳарнинг жануби-ғарбий чеккасида ва марказий қисмларида Украина қуролли кучларининг қаршилик ўчоқлари сақланиб қолди. Бу вақтда рус қўшинлари шаҳарнинг шарқий қисмида жойлашган саноат зонасини эгаллашга муваффақ бўлди.
РФ қуролли кучларининг Оскол дарёси ғарбий соҳилидаги плацдарми доим оғир қуролларни етказиб бериш ва қўшимча кучлар ўтказишш билан боғлиқ муаммоларга дуч келган: артиллерия ва ҳатто дрон операторлари шарқий қирғоқда туриб ҳаракат қилишига тўғри келган. Натижада плацдарм қирғоқ бўйлаб тор узун чизиқ шаклини олди. Украина қуролли кучлари бир неча бор дарё бўйига ёриб киришга ва плацдармни қисмларга бўлиб ташлашга уринган.
Декабр ойида Украина қуролли кучлари томонидан яна бир уриниш амалга оширилди. Украина бўлинмалари Купянскнинг шимолий чеккаларини эгаллади ва амалда шаҳар маркази ва жанубидаги россиялик штурмчиларни асосий плацдармдан узиб қўйишга муваффақ бўлди.
