Ноябр ойида автобозор: сотувлар тенденцияси ва асосий кўрсаткичлар

Иқтисодий тадқиқотлар ва ислоҳотлар маркази жорий йил ноябр ойи якунлари бўйича Ўзбекистон автомобил бозорининг ҳолатига доир янгиланган таҳлилни эълон қилди. Унда бирламчи бозорда ўсиш, иккиламчи бозорда эса пасайиш тенденцияси қайд этилган.

Фото: Kun.uz

Таҳлилга кўра, бирламчи бозорда енгил автомобиллар савдоси йиллик ҳисобда 15 фоизга ошган. Бу ўтган йилнинг ноябр ойига нисбатан тахминан 4,4 минг донага кўпдир.

Шу билан бирга, маҳаллий ишлаб чиқарилган янги енгил автомобиллар сегментида реализация ҳажми тахминан 30 минг донани ташкил этиб, йиллик ҳисобда 13,6 фоизга ўсган.

Иккиламчи бозорда эса ноябр ойида тахминан 52 мингта фойдаланилган енгил автомобил реализация қилинган бўлиб, бу ўтган йилнинг шу даврига нисбатан 8 фоизга кам.

Қайд этилишича, иккиламчи бозорда электромобиллар реализацияси йиллик ҳисобда 1,8 баробарга ошган.