Трамп: АҚШ Венесуэла яқинида ушланган танкерлар ва нефтни ўзлаштиради

АҚШ Венесуэла соҳили яқинида ушлаб қолинган, санкциялар остидаги танкерларни ҳам, улар бортдаги нефтини ҳам ўз тасарруфида қолдиради. Дональд Трампнинг билдиришича, бу нефт стратегик захира сифатида ишлатилиши мумкин.

Фото: US Secretary of Homeland Security Kristi Noem's X account/AFP

Венесуэла соҳиллари яқинида ушлаб қолинган, санкциялар остидаги нефт танкерлари АҚШ мулкида қолади. Бундай баёнотни АҚШ президенти Доналд Трамп душанба куни, 22 декабрда журналистлар билан мулоқотда берди.

У Венесуэла соҳили яқинида 10 декабр куни ушлаб қолинган нефт танкери ҳақидаги саволга жавобан, мазкур кеманинг бортидаги хом нефт ҳам АҚШ мулки сифатида қолишини билдирди. Трампнинг айтишича, бу хомашё стратегик захира сифатида қўлланиши мумкин.

Сўнгги пайтларда АҚШ Кариб денгизида Вашингтон маълумотларига кўра, Венесуэла санкцияларни четлаб ўтиш учун фойдаланаётган иккита кемани аллақачон ушлаган. Бундан ташқари, ОАВ хабарларига кўра, 22 декабрдан бери АҚШ эҳтимол ушбу давлатнинг “соя флот”и таркибига кирувчи учинчи танкерни таъқиб қилмоқда.

16 декабр куни Доналд Трамп Венесуэлага кетaётган ёки ундан чиқиб кетаётган санкциялар остидаги нефт танкерларига нисбатан денгиз блокадасини жорий этиш тўғрисида фармойиш берди. Эртаси куни, 17 декабрда, Трамп ўзининг Truth Social ижтимоий тармоғида Венесуэла АҚШдан “илгари ўғирлаган нефт, ер ва бошқа активлар”ни “дарҳол” қайтаришини талаб қилди.

Каракасда АҚШ талаблари халқаро ҳуқуқни бузувчи “таҳдид” деб аталди.

2000-йиллар бошида Венесуэла барча нефт конларини миллийлаштирган эди. Бу хорижий компаниялар, жумладан АҚШ компаниялари манфаатларига ҳам таъсир қилган ва компенсация талаблари билан боғлиқ можаро келиб чиққан. 22 декабр куни журналист саволига жавобан Трамп ўша пайтда мулки мусодара қилинган йирик америкалик нефт қазиб чиқарувчи концернлар билан гаплашганини тасдиқлади. Бироқ у бу музокаралар мазмунини ошкор қилмади.

АҚШ ҳукумати Венесуэла раҳбари Николас Мадурони истеъфога кетишга мажбурламоқчими, деган савол юзасидан Доналд Трамп шундай деди: “У нима қилишни хоҳласа, ўзи ҳал қилади. Ўйлайманки, унинг бундай қилиши ақлли иш бўлар эди”. “Агар у нимадир қилишни, қатъият кўрсатишни истаса, бу — қатъият кўрсата оладиган сўнгги марта бўлади”, — дея қўшимча қилди АҚШ етакчиси.

Ўз навбатида, Николас Мадуро 22 декабр куни Трампнинг Венесуэлага кетaётган ёки ундан чиқиб келаётган нефт танкерларига нисбатан блокада жорий этиш кўрсатмасини изоҳлар экан, АҚШ президентига Каракасга таҳдид қилиш ўрнига “ички иқтисодий ва ижтимоий муаммоларга диққат қаратиш” яхшироқ бўлишини айтди.