DW хабарига кўра, ракета Киевнинг шимоли-шарқидаги Деснянский туманида жойлашган уйга теккан. Бинонинг пастки саккиз қаватидаги хонадонларда ёнғин чиққан.
Кличко 16 нафар жароҳатланган киши касалхонага ётқизилганини, жабрланганларнинг тўрт нафари оғир аҳволда эканини билдирган.
Мэр, шунингдек, Соломенский туманида дрон офис биносига урилгани, Дарницкий туманида дрон парчалари стадион ҳудудига тушгани ва Деснянский туманида омборхона ёнганини маълум қилган.
Украина президенти Володимир Зеленскийнинг айтишича, ҳужум нишони Киевнинг асосий энергетика объектларидан бири — 4-иссиқлик электр маркази бўлган. Зарба Доналд Трамп эълон қилган энергетик сулҳ фонида амалга оширилган.
Зеленский ҳамкорлар Украинани Россия баллистик ракеталарни учиргани ҳақида огоҳлантирмаганини таъкидлаган. У энергетика объектлари вайрон қилинаётган бир пайтда ҳатто ракета учирилиши ҳақида огоҳлантириш олинмаётганини адолатсизлик деб баҳолаган.
Украина президенти АҚШ воқеаларни ва уруш давом этаётгани учун ким жавобгарлигини кўриши муҳимлигини айтган. У Украина разведкаси маълумотларига таяниб, Россия янги баллистик ракета зарбаларига тайёрланаётганини ҳам билдирган.
Айни куни Вашингтонда журналистлар билан гаплашган Доналд Трамп АҚШ Украинага разведка маълумотларини бермаётгани ҳақидаги хабарларни рад этган.
«Биз уларга ёрдам беряпмиз ва разведка маълумотларини алмашяпмиз», — деган Трамп. Унинг сўзларига кўра, АҚШ урушни тугатиш учун Украина ва Россия билан ишламоқда.
Аввалроқ Трамп Владимир Путин тинчлик келишувига Зеленскийдан кўра кўпроқ қизиқиш билдиряпти, деган фикрни айтган эди. Энергетик сулҳнинг бузилиши ҳақидаги саволга эса «қоидабузарликлар ҳар икки томондан бўлганини» билдирган.
Бу Украина шаҳарларига сўнгги кунлардаги навбатдаги ҳужумдир. 13 октябрга ўтар кечаси Харкивга берилган зарба оқибатида, шаҳар мэри Игор Терехов маълумотига кўра, уч киши ҳалок бўлган. 12 октябр оқшомида Киевдаги 25 қаватли уйга дрон урилиши натижасида эса икки киши ҳаётдан кўз юмган.
Россия Мудофаа вазирлиги ўз навбатида Киевдаги ҳарбий-саноат корхоналари ва логистика марказларига, жумладан, дрон ишлаб чиқариш цехи ҳамда локомотив депосига зарбалар берилганини даъво қилган.
