Шавкат Мирзиёев йил давомида хорижий давлатларга 28 та ташрифни амалга оширди

2025 йил давомида президент Шавкат Мирзиёев томонидан хорижий давлатларга 28 та ташриф амалга оширилди. Бу ҳақда Ташқи ишлар вазирлиги маълумот берди.

Қайд қилинишича, шунингдек, Ўзбекистонга олий даражада 23 та ташриф қабул қилинди. Мазкур ташрифлар доирасида 7 та давлат, 17 та расмий, 27 та амалий ташриф ташкил этилди. Натижада «сиёсий мулоқотлар мазмунан чуқурлашиб, узоқ муддатли ҳамкорлик учун келишувлар ва амалий механизмлар шакллантирилди».

Шу билан бирга, 20 га яқин халқаро тадбирларда давлат раҳбарининг иштироки Ўзбекистоннинг халқаро майдондаги «фаол позицияси ҳамда минтақавий ва глобал ўрнини сезиларли даражада оширди».

Ўзбекистон мезбонлигида ўтказилган 10 та нуфузли халқаро тадбир «дунё ҳамжамиятининг мамлакатимизга бўлган юқори даражадаги ишончини ифодалади».

Ўзбекистон томонидан минтақавий ҳамкорлик ва барқарор тараққиётга қаратилган «100 га яқин муҳим ташаббуслар илгари сурилди».