Диверсия туфайли Берлинда 25 500 квартира электрсиз қолмоқда

Берлин жануби-ғарбидаги тахминан 25 500 хонадон ва 1200 та корхона ҳали ҳам электр энергиясисиз қолмоқда — 3 декабр куни сўл экстремистлар диверсияси оқибатида юз берган кенг кўламли узилишлардан кейин. Бу ҳақда сешанба, 6 январ куни Берлин электр тармоғининг тизимли оператори Stromnetz Berlin хабар қилди.

Кенг кўламли электр узилишига сабаб — Телтов канали устидаги кабелда, Лихтерфелде иссиқлик-электр маркази (ИЭМ) яқинида содир этилган ўт қўйиш бўлди. Stromnetz Berlin маълумотича, Целендорф, Николасзе ва Ванзе туманларидаги таъмирлаш ишлари 8 январ куни кечқурунгача давом этади. Берлин бургомистри Кай Вегнер баҳолашича, электр узилишлари шаҳарнинг тахминан 100 000 аҳолисига таъсир қилган.

Берлин жануби-ғарбидаги қарийб 20 та мактаб ҳали ҳам ёпиқ қолмоқда. Stromnetz Berlin маълумотига кўра, ҳудудлардаги 74 та қариялар уйидан 72 таси душанба куни кечқурунга қадар электр билан таъминланган.

Критик инфратузилмага қилинган ҳужум учун жавобгарликни Vulkan номли сўл радикал экстремист гуруҳ вакиллари ўз зиммасига олган. Улар ИЭМга қилинган ҳужумнинг мақсади “қазилма ёнилғи энергетикасининг ўзи” эканини билдирган.

Бу ташкилот 2024 йил март ойида Бранденбург ерида ҳам диверсия уюштирган эди. Ўшанда электр узатиш линияларига ўт қўйилиши оқибатида АҚШнинг Tesla компанияси заводи зарар кўрган. Берлин полицияси Vulkan гуруҳининг баёнотини ишончли деб ҳисоблайди. Диверсия бўйича тергов билан шаҳарнинг Бош прокуратураси шуғулланмоқда.

Берлин бургомистри Кай Вегнер ва шаҳарнинг ички ишлар бўйича сенатори Ирис Шпрангер кабелга ўт қўйишни “терроризм” деб атади. Кай Вегнер Германиянинг муҳим инфратузилмаси заиф эканини ҳам тан олди ва келажакда бундай ҳужумлардан ҳимояланишга чақирди.

ГФР ички ишлар вазири Александр Добриндт ҳам шу фикрга қўшилди: “Бизнинг баҳомизга кўра, гап мақсадли режалаштирилган ҳужум ҳақида кетмоқда”, — деди у.