Тил сертификати, ишчи виза, чипта: миграция жамғармасидан компенсация берилади

Xorijda ish электрон тизимида рўйхатдан ўтган ва ташкиллаштирилган меҳнат миграциясига кетаётган фуқароларга Миграция жамғармаси ҳисобидан хорижий тил/касб имтиҳонлари, ишчи виза ҳамда йўл чиптаси учун белгиланган миқдорларда компенсация тўланади. 2025 йилда тўловни олишга улгурмаганлар учун маблағлар 2026 йил 9 январга қадар аризада кўрсатилган пластик картага ўтказиб берилиши билдирилган.

Миграция агентлиги маълум қилишича, Xorijda ish тизимида рўйхатдан ўтган ва ташкиллаштирилган тартибда хорижга ишга кетаётган фуқароларга қуйидаги харажатлар учун компенсация ажратилади:

хорижий тил ва (ёки) касб бўйича имтиҳон муваффақиятли топширилиб, сертификат олинганда — БҲМнинг 3 бараваригача;
ишчи визани расмийлаштириш учун — БҲМнинг 5 бараваригача;
йўл чиптаси хариди учун — БҲМнинг 2 бараваригача.

Амалдаги меъёрларга кўра, базавий ҳисоблаш миқдори (БҲМ) 2025 йил 1 августдан 412 000 сўм этиб белгиланган.

Шунга кўра, компенсациянинг энг юқори миқдори ҳисоб-китобда тахминан:

3 БҲМ — 1 236 000 сўмгача;
5 БҲМ — 2 060 000 сўмгача;
2 БҲМ — 824 000 сўмгача.

Шунингдек, агентлик ахборотида 2025 йилда компенсация тўловларини олишга улгурмаган фуқароларга маблағлар 2026 йил 9 январга қадар аризада кўрсатилган пластик карта рақамига ўтказиб берилиши маълум қилинган.