Флоренция театри Захарова ва Репин иштирокидаги намойишларни бекор қилди

Светлана Захарова иштирокидаги балет ва скрипкачи Вадим Репин қатнашадиган чиқишлар 20 ва 21 январ кунлари бўлиши керак эди. Флоренциядаги Maggio Musicale театри эса бекор қилишни “давом этаётган халқаро таранглик” билан изоҳлади.

Фото: AP

Италиянинг Флоренция шаҳридаги Maggio Musicale театри россиялик балерина Светлана Захарова ва унинг турмуш ўртоғи — скрипкачи Вадим Репин иштирок этадиган “Па-де-де на пальцах и для пальцев” балетининг икки намойишини бекор қилди. Театр раҳбарияти бу қарорни пайшанба куни, 8 январда “давом этаётган халқаро таранглик — муваффақиятли намойишга хавф солиши мумкин бўлган муҳитни яратди”, деб изоҳлади.

Спектакллар 20 ва 21 январ кунларига режалаштирилган эди. Маданий муассаса намойиш бекор қилинишининг бошқа тафсилотларини келтирмади. Томошабинларга чипта пуллари қайтарилади.

Италиянинг La Nazione кундалик газетаси ёзишича, чиқишлар бекор қилинишига Украинанинг Италиядаги элчихонаси позицияси сабаб бўлган. Нашр маълумотига кўра, дипломатик миссия театр раҳбариятига, Флоренция мэри Сара Фунарога ва шаҳар кенгашига хат йўллаб, балерина ва скрипкачининг чиқишларини бекор қилишни сўраган. Элчихона уларнинг иштироки Кремл билан алоқалар туфайли “қабул қилиб бўлмас” эканини билдирган.

2024 йилда ҳам Светлана Захарованинг Словения пойтахти Люблянадаги фестивал доирасида чиқиши бекор қилинган эди. Ўша пайт Украина ТИВ Словения ҳокимияти билан украин диаспораси кўмагида элчихонанинг кенг кўламли иш олиб борганини маълум қилган.

2007–2011 йилларда Светлана Захарова РФ Давлат думаси депутати бўлиб, “Ягона Россия” партиясидан сайланган. 2018 йилдан буён у Россия президенти ҳузуридаги Маданият ва санъат бўйича кенгаш таркибига киради. 2024 йилда эса у президентлик сайловларида Владимир Путиннинг ишончли вакили бўлган.

Тайёрлаган: Отабек Матназаров

#намойиш #Италия #Флоренция #Светлана Захарова