Қўшимча функционаллар
-
Тунги кўриниш
Гулистонда суд қарорисиз бузилаётган дўконлар ва таксичилардан пул ундирган жиноий гуруҳ – маҳаллий дайжест
Кун давомида Kun.uz ёритган муҳим маҳаллий янгиликлар билан таништирамиз.
Тошкентда таксичилардан пул ундирган жиноий гуруҳ қўлга олинди
Тошкент шаҳри – Яшнобод тумани йўналишида такси хизмати кўрсатувчи ҳайдовчиларга босим ўтказиб, таҳдид қилиш орқали ноқонуний даромад орттириш мақсадида ўзбошимчалик билан ойлик ўлпон жорий этган гуруҳ аъзолари қўлга олинди.
ИИВ маълумотига кўра, гуруҳ етакчиси сифатида Алимқулов Шерзод Умаралиевич жиноий шериклари билан биргаликда ҳайдовчига куч ишлатиб, тан жароҳати етказган. Арзчининг ҳаёти ва соғлиғига зиён етказиш билан қўрқитиб, Яшнобод тумани ҳудудида қатновни давом эттириши эвазига олдиндан 2 ойлик тўлов сифатида 810 АҚШ доллари олган.
Ҳолат юзасидан жиноий гуруҳ етакчиси ва унинг шерикларига нисбатан жиноят иши қўзғатилиб, тергов ҳаракатлари олиб борилмоқда.
Сирдарёда тадбиркорлар мулки суд қарорисиз бузилмоқда
Сирдарё вилояти, Гулистон шаҳри, Навоий шоҳкўчасида жойлашган енгил типдаги савдо дўконларини 8 январ куни мажбурий тартибда бузиш бошланди. Мурожаатчиларга кўра, бузиш ишлари суд қарорисиз, компенсациясиз, тезкорлик билан амалга оширилган. Арзчилар ИИБга олиб кетилаётгани айтилмоқда.
Бу ҳудуд 2007 йилда Гулистон шаҳар ҳокимлигининг қарори билан енгил типдаги савдо дўконлари қуриш учун ажратилган. Шу ерда 30 дан ортиқ тадбиркор қарийб 18 йил давомида расман фаолият юритиб келган. Уларнинг айтишича, шу йиллар мобайнида солиқлар тўланган, фаолиятга ҳеч қандай эътироз билдирилмаган.
Тадбиркорлар сўзларига кўра, шаҳар ҳокимлиги вакиллари дўкон эгаларидан қисқа вақт ичида савдо объектларини ўзлари бузиб ташлашни талаб қилган. Акс ҳолда, оғир техника ёрдамида бузиб ташланиши айтилган. Айрим мулкдорлар суд қарори тақдим этилишини сўраб, бузишга қарши чиққан.
Учтепа тумани ҳокимлиги ходими 3 минг доллар билан ушланди
Тошкент шаҳрининг Учтепа тумани ҳокимлиги вакилининг ноқонуний ҳаракатига чек қўйилди. Ҳокимликнинг Уй-жой коммунал хизмат кўрсатиш ва ободонлаштириш бўлими бош мутахассиси ноқонуний равишда тадбиркордан 3 минг доллар олган вақтида ашёвий далиллар билан ушланган.
У гўёки 2026 йилда туман ҳудудида бузилиши лозим бўлган савдо дўконлари ва бошқа манзиллар рўйхати тузилаётганини айтиб, тадбиркорга тегишли дўконни туман ҳокимлигида юқори лавозимда ишловчи яқин алоқалари орқали мазкур рўйхатга киритмаслик ҳамда буздирмаслик эвазига пул талаб қилган.
Бош мутахассисга нисбатан жиноят иши қўзғатилиб, қамоқ эҳтиёт чораси қўлланган.
Давлат стипендияларини тайинлаш тартибига ўзгартиришлар киритилди
Вазирлар Маҳкамаси қарори билан магистратура мутахассислиги ҳамда бакалавриат таълим йўналишлари талабалари учун Ўзбекистон президенти ва номли давлат стипендияларини тайинлаш тартибига қатор ўзгартиришлар киритилди.
Қарорга мувофиқ, президент ва номли давлат стипендияларига талабгорларнинг ахборот технологиялари, Ўзбекистон тарихи ва хорижий тиллар бўйича билим ҳамда кўникмалари Билим ва малакаларни баҳолаш агентлигида (ҳудудлар бўйича) махсус тест синовлари орқали баҳоланиши белгиланди.
Бундан ташқари, номли давлат стипендиялари совриндори бўлган талабаларга муайян таълим босқичида номли давлат стипендиялари танловларида қайта иштирок этишга рухсат этилмаслиги белгиланди.
