Alphabet компаниясининг капитализацияси илк бор 4 трлн доллардан ошди

Google’нинг бош компанияси бўлган Alphabet дунёда бозор қиймати 4 трлн долларлик чегарадан ошган тўртинчи компанияга айланди. Компания муваффақияти сунъий интеллект технологияларини ривожлантириш билан боғлиқ.

Фото: Kun.uz

Alphabet — Google’нинг бош компанияси бозор қиймати душанба куни, 12 январда 4 трлн долларлик чегарадан ошиб кетди. Шу тариқа Alphabet ушбу даражага етган дунёдаги тўртинчи компания бўлди — Nvidia, Microsoft ва Apple’дан кейин.

Шу билан бирга, Alphabet 2019 йилдан бери биринчи марта капитализацияси бўйича Apple’ни ортда қолдириб, ушбу кўрсаткич бўйича дунёда иккинчи ўринга чиқди. Биринчи ўринда эса график процессорлар ишлаб чиқарувчи Nvidia туради.

Reuters агентлиги эслатишича, 2025 йилда Alphabet акциялари қиймати тахминан 65 фоизга ошган. Кузатувчилар бу муваффақиятни компаниянинг сунъий интеллект ва булутли технологияларга (cloud) катта эътибор қаратаётгани, шунингдек Gemini 3 номли янги мултимодал нейротармоқ модели ишга туширилгани билан боғлайди.

Alphabet акциялари нархига 2025 йил сентябрда АҚШ суди чиқарган қарор ҳам таъсир кўрсатган: у қарор компанияга Chrome браузери ва Android мобил операцион тизими устидан назоратни сақлаб қолиш имконини берган.

Аввалроқ Reuters Samsung Electronics компанияси жорий йилда Gemini асосида ишлайдиган сунъий интеллект функциялари билан жиҳозланган мобил қурилмалар сонини икки баравар оширишни режалаштираётганини хабар қилган эди.

Тайёрлаган: Отабек Матназаров

#Google #Alphabet #капитализация