Майя Санду Молдованинг Руминияга қўшилишини қўллаб-қувватлашга тайёр

Молдова президенти Майя Санду референдум ўтказилган тақдирда, ўз мамлакати НАТО ва ЕИ аъзоси бўлган Руминияга қўшилиш тарафдори сифатида овоз беришга тайёр эканини айтди. Давлат раҳбари ўз позициясини мамлакатни Россия томонидан бўлаётган босимдан ҳимоя қилиш истаги билан асослади. “Агар бизда референдум бўлса, мен Руминия билан бирлашиш учун овоз бераман”, — дея таъкидлади у 11 январ, якшанба куни эълон қилинган The Rest is Politics номли британ подкастига берган интервюсида.

Санду бугунгача ҳам бир неча бор Москвани ўз мамлакатининг ички сиёсий ишларига аралашишга уринишларда айблаган. “Дунёда нималар бўлаётганига қаранг. Молдова каби кичик мамлакат учун демократия сифатида, суверен давлат сифатида яшаб қолиш ва, албатта, Россияга қарши тура олиш тобора қийинлашиб бормоқда”, — деди у подкастда.

Reuters агентлиги маълумотларига кўра, Молдованинг 2,4 миллион аҳолисининг тахминан 1,5 миллиони Руминия фуқаролигига эга. Бироқ сўровлар кўрсатишича, мамлакат аҳолисининг фақат тахминан учдан бир қисми икки мамлакатнинг бирлашиши ғоясини қўллаб-қувватлайди.

Майя Санду таъкидлашича, у аҳолининг кўпчилиги унинг ёндашувини қўллаб-қувватламаслигини тушунади. Унинг қўшимча қилишича, Молдованинг Европа Иттифоқига қўшилиши — анча реалистик сценарий.

Молдованинг ҳозирги ҳукумати ўз олдига мамлакатни 2030 йилгача Европа Иттифоқига аъзо қилиш мақсадини қўйган. Бироқ бунинг учун Кишинёв бир қатор мураккаб ислоҳотларни амалга оширишига тўғри келади.