Мирзо Улуғбек туманида кўп қаватли уйда ёнғин содир бўлди

Кеча, 13 январ куни соат 23:59 да Тошкент шаҳар, Мирзо Улуғбек тумани, Ниёзий кўчасида жойлашган кўп қаватли уйдаги хонадонларнинг бирида ёнғин содир бўлгани тўғрисида Тошкент шаҳар ФВББга хабар қилинган.

Фото: Ижтимоий тармоқлар

Хабар қабул қилиниши билан ҳодиса жойига ёнғин-қутқарув бўлинмалари йўналтирилган. Ёнғин-қутқарув экипажи соат 00:04 да воқеа жойига етиб бориб, ёнғинни ўчириш ишларини бошлаган. Олиб борилган тезкор ҳаракатлар натижасида ёнғин соат 00:37 да тўлиқ бартараф этилган.

Маълум қилинишича, ёнғин оқибатида тан жароҳати олганлар йўқ. Ҳозирда ёнғин келиб чиқиш сабаблари ҳамда моддий зарар миқдорига аниқлик киритиш мақсадида тегишли тартибда ўрганиш ишлари олиб борилмоқда.

Фуқароларга хонадонларда электр жиҳозларидан хавфсиз фойдаланиш, газ ускуналари ва иситиш воситаларини назоратсиз қолдирмаслик, шунингдек, ёнғин хавфсизлиги қоидаларига қатъий риоя қилиш тавсия этилади.

Тайёрлаган: Отабек Матназаров

#ёнғин #Мирзо Улуғбек тумани