Будапештдаги элчихона фирибгарлик қурбони бўлган мигрантларга ёрдам берди

Ўзбекистоннинг Будапешт шаҳридаги элчихонаси хорижда меҳнат қилаётган ватандошларнинг ҳуқуқ ва қонуний манфаатларини ҳимоя қилиш бўйича мунтазам ишлар олиб бораётганини маълум қилди. Хусусан, Хорватиядан Ўзбекистонга қайтишда қийналган икки нафар фуқарога авиачипта олиб беришда амалий ёрдам кўрсатилди.

Фото: “Дунё” АА

“Дунё” АА хабар қилишича, яқинда Ўзбекистон фуқаролари А.А. ва Р.И. элчихонанинг консуллик бўлимига мурожаат қилиб, ватанга қайтишда кўмак сўраган. Мурожаатчилар билан суҳбат жараёнида уларни хусусий бандлик агентлиги фирибгарлик йўли билан алдагани аниқланган.

Маълум бўлишича, ишга жойлашиш мақсадида чет элга чиққан ҳамюртлар кейинчалик фирибгарлар тузоғига тушганини англаб етган. Натижада улар ишсиз, пулсиз ҳолатда қолиб кетган ва Ўзбекистонга қайтиш учун авиачипта сотиб олишга молиявий ёрдам сўраган.

Юзага келган вазиятни инобатга олган ҳолда элчихона томонидан Ўзбекистон Ташқи меҳнат миграцияси агентлиги билан ишчи алоқалар ўрнатилган. Ўтказилган суриштирув ва келишувлар натижасида Меҳнат мигрантларини қўллаб-қувватлаш ва уларга кўмаклашиш жамғармаси маблағлари ҳисобидан мурожаатчиларга авиачипталар сотиб олиниб, уларнинг ватанга қайтиши таъминланган.

Тайёрлаган: Отабек Матназаров

#фирибгарлик #Будапешт