Тошкентда чанг автобусда йўловчилар ташилган ҳолат ортидан масъуллар жазоланди

“Тошшаҳартрансхизмат” йўловчилардан айни вазият учун узр сўраб, 121-автобусни йўналишга чиқаришда масъул бўлган 3 нафар ходимнинг маошига 20 фоиздан жарима солинганини, транспорт санитар ҳолати жойига келтирилганини маълум қилди.

Фото: Тошшаҳартрансхизмат

Юнусобод йўналишининг “9-даҳаси (“Уч қаҳрамон” кўчаси) – Чинни бозор” оралиғида ҳаракатланувчи 121-сонли автобусда тозаликка риоя қилинмаганига оид Kun.uz хабаридан сўнг “Тошшаҳартрансхизмат” АЖ расмий муносабат билдирди.

Қайд этилишича, 18-автобус саройи тасарруфидаги 121-йўналиш автобус материал тармоққа жойланганидан кейин йўналишдан дарҳол корхонага қайтарилган. Автобус ювиб, тозаланиб? санитар ҳолати жойига келтирилган.

“Шу ҳолатда йўналишга чиқаргани учун масъул ходимларга, яъни навбатчи механик ва хўжалик бўлими бошлиғи, корхона раҳбари ўринбосарининг ойлик маошига 20 фоиздан жарима қўлланди. Юқоридаги ҳолатлар такрорланмаслиги учун масъул ходимларга йўналишга чиқараётган автобусларни техник фаол санитар ҳолати яхши бўлиб чиқиши учун кўрсатма берилди ва йўриқномалар ўтказилди”, – дейди 18-автобус саройи масъул ходими Убайдулла Абдуллаев.

Расмийлар келтирилган ноқулайликлар учун йўловчилардан узр сўраган.